-طب هو فين انا عايزه اشكره واتأسف ليه على الطريقه اللي كلمته بيها
-مش هنا دا راح المسجد مع ابوه اصل النهارده مولد الحسين رضي الله عنه وزمانهم في حلقة الذكر دلوقتي
-الله انا نفسي اوي يا ماما اروح هناك
-حاضر يا حبيبتي قومي انتي بس بالسلامه يارب وهناخدك نزورك الحسين والسيده وكل ال البيت كمان
-لاء ياخالتو والنبي عايزه اتفرج على المولد انا اول مره احضر حاجه زي دي
-طب اقولك خلصي الطبق ده كله واشربي عصير البنجر ده وانا هاتصل بمالك واخليه يجي ياخدني، بس يارب مايكونش في حلقة الذكر احسن ده لو كان هناك عمره ما هيرد على تليفونه
اعطتها طبق الطعام وبدأت الصغيره تأكل بحماس
وهمت لتحدث ابنها عبر الهاتف ولكن اختها اوقفتها
-استنى بس يا مجيده تروح فين احنا في اي ولا في اي بس دا ابوها لسه ميت امبارح وهي عايزه تروح المولد
حركت لها يدها في الهواء بعدم اهتمام وامسكت هاتفها تبحث عن اسم ولدها فيه
-ياختي الحي ابقى من الميت وبعدين هو احنا رايحين نرقص داحنا رايحين بيت ربنا
الو ايوا يامالك انت فين يا حبيبي
يتبع…