حاولت أن تعتدل فعاونتها وهي تقول
-هو دكتور
ضحكت خالتها
-اومال ايه دكتور جراح اد الدنيا وواخد شهادته من بره كمان وقعد في بلاد بره يجي عشر سنين بس حبه للحسين وشوقه ليه رجعه تاني
-حبه للحسين انا مش فاهمه حاجه ياخالتو؟
-هافهمك يا روح خالتو
اصل مالك من وهو صغير كان على طول بيروح مع ابوه جامع الحسين يصلوا فيه عشان قريب مننا يعني ويحضرو حلقات الذكر ويحفظ القرأن والاناشيد الدينيه واتعلق بالضريح اوي
كان كل ما يبقى نفسه في حاجه يروح جنب الضريح ويقعد يدعي ربه ويصلي، وربنا يستجيب لدعاه
لحد ما أصحابه طلعو عليه (ساكن الضريح)
-طب وفين مراته وولاده انا مش شوفتهم ولا هو متجوز بره؟
ارتسم الحزن على وجه خالتها وتنهدت بألم
-ولا بره ولا جوه مالك مش متجوز عدي التلاتين سنه ورافض الحكايه دي وكل ما افتح معاه الكلام يقولي انا مافيش في حياتي غير شغلي و الحسين ومافيش في دماغي حاجه تانيه
ربتت اختها على كفها بحب تحاول أن تخفف عنها
-ربنا يسعده ويريح قلبه ماتخفيش عليه ابنك طيب وراجل جدع وإنشاء الله ربنا هيرزقه ببنت الحلال