ثم أضافت بوجع أكبر بعدما طفح بها الكيل.
– ٢٦ سنة يا مُـراد عايشة معاك تحت سقف واحد وكل اللي بيربطنا ببعض هي ورقة فيها إسمي وإسمك وأتنين شهود..
٢٦ سنة وأنا عايشة معاك تحت سقف واحد وفي فرشه واحدة بس عمرنا ما كنا في يوم واحد..
عمري ما شوفت في عيونك نظرة حب واحدة..
بشوف في عيونك الإحترام والتقدير وأني أم مـريـم اللي عوضتك عن حاجات كتير بس عمري ما شوفت شـهـيـرة في عيونك..
فتابعت بعدما سقطت عبراتها بقهرة.
– أنت نسيت أني واحدة ست فنت نص عمرها وهي عايشة تحت رجليك وأن عندي إحساس زييّ زيّ أي ست في الدُنيا..
فسقطت عبراتها بغزارة وهي تشعر وكأنها كالذبيح الذي علقت روحه بين الحياة والموت واستطردت بعد ذلك بوجع أكبر وقهرة حقيقية.
– ٢٦ سنة يا مُـراد وأنا بتعذب وشايله ذنب مش ذنبي وبتعاقب على حاجة أنا معملتهاش..
” مُـراد ” بتماسك.
– أنا من أول يوم وأنا قايلك أن اللي بينا هي مـريـم وأن الحب والمشاعر مش هما أساس علاقتنا..
من أول يوم وأنا معرفك أن مسؤليتك أنتي ومـريـم في رقبتي وعهد مش هيحله إلا الموت..
أنا كنت واضح وصريح معاكي يا شـهـيـرة من البداية وأنتي كنتي موافقة على كلامي ده من الأول..
” شـهـيـرة ” بصراخ ونبرة يقطع لها نياط القلب وهي تلكم قلبها بقهرة.
– أنا بني آدم..
أنا بني آدم لحم ودم يا مُـراد عايشة مع واحد بقالي ٢٦ سنة ما شوفتش منه غير كل خير..
رعاني ورعىٰ بنتي وسترني وشيلني أسمه وعمل معايا كل حاجة حلوة في الدُنيا وشوفت فيه كل حاجة كويسة الست تتمناها في الراجل اللي معاها..
عايزني بعد كل ده قلبي ميعلنش عصيانه ويحبك..
فأضافت بوجع أكبر.
– ايووووه يا مُـراد أنا حبيتك وحبيتك أوي..
سميه حب عشرة، حب تعود، عرفان جميل سميه زيّ ما تسميه بس أنا حبيتك يا مُـراد وده مش بإيديا صدقني..
يتبع….