صباح بغضب :
-الزفت دا ايه اللي جابه معاكي مش قلتلك تيجي لوحدك
فردوس؛ و الله ما اقصد يا صباح و الله العظيم ما كان قصدي هو سمعني و انا بكلمك و كان هتقلب ليلة سوداء على دماغي لو مقلتلوش و انتي عارفة ميعرفش الرحمة
صباح :ما هو دا اللي مخوفني انتي هتاخديه و تمشوا من هنا قبل ما رأفت يحس الاتنين دول لو قعدوا سوا هيعملوا مصيبة
فردوس:شفتيها يا صباح
صباح سكتت للحظات
-معرفتش اشوفها….
فردوس :طب احكي لي بقا كل حاجة من اول ما جيتي علشان مفهمتش منك حاجة في الموبيل
صباح بدأت تحكيلها عن اللي حصل من اول ما نزلت المنصورة و مقابلتها مع حليمة
فردوس شهقت بصدمة و هي بتضرب على صدرها
-يلهوي يا صباح…. حليمة تاني ما كنا خلصنا منها… ما تسيبك من رأفت بقا يا صباح و ابعدي بكفاياكي
صباح :
-أنا بحبه يا فردوس… لما وعيت على الدنيا معرفتش احب سعد و رأفت كان أول واحد احبه في حياتي
عارفه انه بتاع نسوان و حلنجي بس انا بحبه رغم جوازنا في السر و رغم طريقته معايا بحبه اوي يا فردوس
فردوس :دا انتي كدا تبقى مجنونة يا صباح
و الله العظيم تبقى مجنونة لو وافقت تاذي بنتك علشان ترضى سي زفت
صباح :أنا عارفة ان دا كله غلط بس انا مش عايزاه اخسره و عندي حل
انا ممكن اعمل اللي هو عايزاه بس في نفس الوقت اخرب له خطته و أبلغ شهاب باللي بيحصل و شهاب هيقدر يحميها و في نفس الوقت ماذيش غزال
فردوس بحزن:
-شيلتك تقيلة يا صباح تقيلة اوي
ظلمتي نفسك يوم ما حبيتي رأفت المنشاوي
كأنه ابتلاء ياريتك عرفتي تقلبي سعد في قرشين و تهربي منه لا دا انتي قعدتي و خلفتي و جبتي بنت للدنيا دي علشان تعيش يتيمة و امها عايشة و سايبها
تتمرمط على ايد الست اللي كانت مخليه حياتك جحيم
فوقي يا صباح ابوس ايدك و كفاياكي
صباح فضلت قاعدة في الاوضة ساكتة
فردوس خرجت على صوت رجب و هو بيزعق علشان عايز الغداء