خلي عندك يقين بالله يا بنتي وكل حاجة خير
مسحت نادين دموعها وقالت : ونعم بالله
فتحت شنطتها وطلعت فلوس وإدتهالها في إيديها وقالتلها : شكراً علي الكلمتين دول بجد طمنتيني
أخدت الست الفلوس وقالت بِإبتسامة : ربنا يطمنك قريب ويطمن قلبك ، وإفتكري كلمتي ، لعلُه خير يا حبيبتي
هزت نادين راسها وإبتسمتلها ، مشيت الست وحسِت نادين بِراحة وقالت : لعلُه خير
قامت نادين من مكانها وركبت تاكسي ووقفتو عند صيدليه دخلت جابت العلاج وطلعت ركبت التاكسي تاني وروحت بيتها .
أول ما فتحت الباب لقِت نوح قاعد قدام الشاشه وبيتفرج علي فيلم أكشن ، قفلت الباب ودخلت الأوضة وقفلت علي نفسها الباب ..
إتفرج نوح علي أخر حته في الفيلم وأول ما خلص قام وراح ناحية أوضة نادين وفتح الباب فاجأة..
كانت نادين واقفة بِقم_يص قصير وفاردة شعرها علشان تسرحو ، أول ما نوح فتح الباب إتخضت وزعقت فيه وقالت : مش تتنيل
تخبط
بصلها نوح من فوق لِتحت وغمز وقال : وهو أنا داخل علي حد غريب دا إنتي مراتي يعني
مردتش عليه وسرحت شعرها ولمتو بِتوكة ، وفتحت الدولاب طلعت الروب بتاع القم_يص ولبستو
قرب نوح منها وقال : عملتي إيه عند الدكتور ؟
مردتش عليه وكانت متجهه ناحية السرير ، مسك إيديها ولفها ليه وقال : أنا بكلمك وردي علياا هنا
شدت إيديها من إيدو وقالت : هو إنت مبتفهمش ؟ ، قولت مش عايزة أتكلم معاك هو بالعافيه
إتكلم نوح بِعصبية خفيفة وقال : عايز أتطمن علي صحة البيبي وبعدها إبقي إتخاصمي براحتك
ربعت إيديها وقالت : ميخصكش وروح هات غيرو من السنيورة بتاعتك
نوح بِصوت عالي سيكا : هو إيه اللي ميخصنيش ؟ ، إنتي عبيطه دا إبني !