دا مكنش بيحصل ، كنت مستني أنها تقولي اي حاجة.. اي حاجة وانا كنت هصدقها بس هي اللي اختارت.. قد ايه انا اتنسيت بسهولة كدا كأني مكنتش موجود ، جايز اكون غلطان ، جايز اكون اتسرعت ومخليتهاش تدافع عن نفسها ولو بكلمة ، شششش اسكت هو انا بقول ايه ، انا ببرر ايه أصلا.. تليفوني رن لما بصيت عليه لقيته..
اتأخرت يا طارق ، كنت مستنيك تتصل من بدري
= افهم من كدا انك سيبت المحاماه وبقيت تشم على ضهر ايدك
بنتعلم من الست امك ، هي مش كانت بتقرا الفنجان برضو
= امممم لسة لسانك قليل الادب يا حسام
مبتغيرش ماانت عارف
= عارف اه.. بس قولي بقا هو ازاي محامي كبير زيك كدا ومشهور ما شاء الله ينسا ان الست لما بتكون حاضنة يبقا الشقة من حقها
هي جاتلك؟
= ايوا ياعم جاتلي وبتشتكيلي.. هو ينفع برضو اللي حصل دا ، ليه يا حسام دا انت خبرة في النسوان برضو
صح عندك حق عشان كدا محدش فاهمك قدي
= طب انا هبقا محترم ومش هرد عليك.. انا متصل اسألك سؤال واحد بس
براحتك حتى لو هتسأل 100 سؤال ، كله من رصيدك
= رصيدي!! ، طيب تمام.. هي نادية تخصك؟
تخصني ازاي مش فاهم
= تلزمك يعني؟
لا يا حبيبي بألف هنا وشفا ، متلزمنيش