= لا انا مش مش هاكل ، انا جيت بس عشان متزعلش
ماهو أنتي لو مكلتيش انا مش هاكل
= انا مليش نفس صدقني
عشان تبقي تصدقيني يا نادية لما اقولك انه غدار ، والله ملوش امان وانتي صدقتيه عشان ضحك عليكي بكلمتين.. انا اللي بحبك وانا اللي كنت جنبك مش هو
= مكنش راضي يسمعني حتى
وهو من امتا بيسمع حد ، لازم هو اللي يكون الوقت صح.. اللي زي حسام دا لازم ميبقاش موجود في حياتك مش تروحي تتجوزيه ويبقا قاعد معاكي طول العمر
= انا مش عارفة هعمل ايه
ولا اي حاجة ، بس وحياتك ل هرفعلك عليه شوية قواضي تخليه يلف حوالين نفسه
= انا مش عايزة مشاكل ، هو بس يسيبلي الشقة اقعد فيها انا و يديني مبلغ كل اول شهر عشان اعرف اصرف ، لان اكيد المصاريف هتكون كتير عليا
ميهمكيش اي فلوس خالص ، شوفي اللي أنتي عايزاه كله وانا تحت امرك
= انت كفاية عليك أوي اللي انت عملته لحد دلوقتي يا طارق وبجد شكرا
بس أنا لسة معملتش اي حاجة ، انا لسة هعمل
” عدا أسبوع.. كنت كل يوم استنا منها مكالمة ولا حتى رسالة لكن مكنتش بلاقي ، كل يوم بكون سهرانة على امل انها تغلط وتكلمني بس