” خدت ابني ومشيت من عنده ، كنت ماشية وأنا مخنوقة.. مكنتش عايزة ارجع البيت.. بقيت مش عايزة ادخله ولا عايزة ارجع تاني اصلا لإني حرفيا مش طايقة وجوده فيه ، لفيت كتير في الشوارع كمحاولة مني لتضييع الوقت بحيث ارجع على النوم وخلاص.. كان هو طول الوقت بيتصل بيا ولكن طبعا انا مكنتش برد لحد ما في النهاية قررت ارجع البيت بس الغريبة اني لما رجعت ملقتوش في البيت ، كنت
لسة هغير هدومي و اقعد ارتاح بس لقيت جرس الباب بيرن ، نفخت ب ضيق و روحت فتحت بس مكنش حسام هو اللي بيرن الجرس
أنتي ايه اللي جابك هنا
= طبعا انا اسفة اني جاية من غير معاد بس انا كان لازم ااجي ، انا عايزة اتكلم معاكي شوية
شوفي يا اسمك ايه أنتي ، أنتي مش عايزة اتكلم مع حد و اذا كان حسام هو اللي باعتك ليا عشان اسامحه قوليله ينسا اللي هو بيفكر فيه دا
” لقيتها بتضحك ، اتعصبت اكتر منها
طب لو هتفضلي تضحكي اتفضلي اطلعي برا
= انا بضحك عشان مش معقول تكوني عايشة مع حسام كل المدة دي ومعرفتيش ان حسام عمره ما يفكر انه يلجأ لأي حد في مشاكله وخصوصا لو مشكلة مع مراته
كفاية أنتي عارفاه كويس يا حبيبتي ، اشبعي بيه
= فجأه كدا نسيتي كل اللي هو عمله عشانك ، فجأه نسيتي انه كان مستعد يضحي بنفسه عشان أنتي تبقي في امان ، أنتي ازاي كدا