في مكان بعيد في ضواحي الصعيد
الدايه : خلاص اهوه .. خلاص
الام : ( وهي رافعه ايديها وماسكه في راس السرير والعرق نازل من جبينها من كتر الالم )
الام : اااااااه .. ( دايسه علي سنانها وحاطه قماشه مابين سنانها عشان صوتها مايطلعش وهي بتصرخ )
الام : ارحميني ياخاله حكيمه .. ارحميني
الدايه ( حكيمه ): ( موطيه ضهرها وبتبص علي الطفل وهو بينزل ما بين رجليها ) : احزقي .. احزقي كمان يابتي
خلاص .. الخلاص جاي اهوه انا شايفه راسه .. احزقي كمان واحده يابتي الله يرضي عنيكي
الام : ( اخدت نفس وابتدت تدفع لتحت ) : ااااااااااااااااه
الطفله نزلت اخيرا والدايا اتلقتها علي ايديها والحبل السري ملفوف حواليها
الدايه : ( حد يناولني مقص ياناس )
الدايه : ( اخدت المقص وقطعت الحبل السري )
الام وهي بتاخد نفسها وفاتحه رجليها والدم ما بين رجليها بينزل منها
الام : ( بخوف والدموع نازله من عنيها ) طمنيني .. طمنيني ياخاله حكيمه .. قولي انه واد مش بنيه.. قولي انه واد عشان يفضل في حضني
خاله حكيمه : ( مسكت طرف الشال الاسود اللي حطاه علي راسها ومسحت دموعها ) ماعيزاش اكدب عليكي يابتي .. مش واد دي بنيه .. بنيه وكيف القمر
الام : ( بخوف وتوتر بلعت ريقها ورفعت ايدها لخاله حكيمه ) ناولهاني ياخاله .. ناولهاني بسرعه خليني اخبيها منهم في حضني