بقي بالراحه جدا يعدلها وحط راسها علي المخده ورفع رجليها من علي الارض وجاب البطانيه وغطاها بالراحه اوي عشان ماتصحاش بيبص لقي دمعه نازله علي خدها وهي نايمه
قرب منها ومسحلها دموعها ووطي اكتر باس جبينها
يزن : ( في سره ) كله هيتصلح اوعدك ❤️
طلع بره وقفل الباب وراه وجرى علي عمار
يزن بقي يخبط علي باب الحمام
يزن : عمار .. في ايه .. عمار انت كويس
عمار مره تانيه بيبص لقي نفسه زي حواليه زرع عالصفين وكان بالنهار
بيبص وراه لقي المزرعه والحراسه عليها من كل حته
ما بين كل شبر والتاني واحد واقف بكلب حراسه والكلاب لونها اسود وشرسه مش كلاب عاديه
مره واحده كل اللي كان معاه كلب سابه علي عمار
عمار حاول يجرى لسه بيرفع ايديه لقي سلاسل في رجليه مسلسلاه في الارض والكلاب جايه عليه
وسامع صوت شمس جوه المزرعه وهي بتقوله ساعدني
عمار وقع في الارض وبقت الكلاب تنهش فيها .. تنهش في كل حته في جسمه وعمار مكانش قادر يتحرك زي ما يكون مشلول
وقع علي ارضيه الحمام وهو بيصرخ وبيحاول يبعد الكلاب عنه
يزن اول ما سمع صوت عمار وهو بيصرخ بقي بيكسر الباب بكتفه مره في التانيه لحد ما الباب اتفتح
يزن : ( بخوف ) عمااار .. عماااار فيك ايه
يزن قعد بسرعه علي ركبه وبقي بيحاول يمسك ايد عمار وينزلها من علي وش عمار وعمار كان كل ده بيتخيل اللي بيحصله
يزن : عمار ..عمار اهدى مافيش حاجه انا يزن
عمار مره واحده نزل ايده وبص ليزن نظره شر