تميم مش عارف يرد يقول ايه ، ده ابن عدوه وهو خايف على أخته وفى نفس الوقت مش عايز يتحكم فيها وفى مشاعرها
تميم : بصى ياسارة انا مش عارف المفروض ارد اقولك ايه ، سبينى بس افكر شويه
سارة : فكر براحتك ، بس والنبى متزعلش من اختك ، يلا كمان عشان منتاخرش على ايهاب وسلمى
تميم : طب يلا اجهزى وقولى لجميله تجهز
كلهم جهزوا ولبسوا وكانوا فى انتظار ايهاب اللى وصل على طول وركبوا العربيات وانطلقوا لبيت سلمى
فى بيت سلمى
كان الكل جاهز ومستعد ومستنى العريس وأهله وسلمى قاعده لابسه فستان حلو اوى اوى والحجاب مخليها ملكه
، ناديه جهزت الحلو والمشروبات والفرحه مش سيعاها أن بنتها هتتجوز
دق الباب وفتح اخو سلمى ورحب بيهم جدا وبدأ تميم يتكلم
تميم : اتشرفت جدا بمعرفتك ياعم حمدى ، ويشرفنا اكتر أننا نطلب ايد الانسه سلمى لصاحبي واخويا ايهاب
ابتسم حمدى : الشرف ليا يابنى ، وانا يشرفنى أن بنتى ترتبط براجل جدع زى ايهاب
ايهاب فرح اوى : متشكر اوى ياعمى واوعدك انى هشيلها فى عيونى
سلمى الفرحه مش سيعاها وكمان سارة فرحانه جدا انها مش هتتفرق عن صحبتها
أما جميله فكانت فى عالم تانى
ايهاب : نقرا الفاتحه بقى
كل الموجودين قروا الفاتحه وناديه زغرطت والكل بارك لسلمى
ايهاب قام وقف فجأة: يعنى خلاص ياعمى كده انت راضى عليا وموافق انى اخد بنتك
حمدى استغرب اوى: جرا ايه يابنى مانا لسه اهو حاطط ايدى فى ايدك وقرأت الفاتحه
ايهاب : لا معلش مش كفايه
حمدى وتميم بصوا لبعض وكل القعدين استغربوا