-ومش قادرة أسامح نفسي إني سيبتهم يمنعوني من زيارة بابا مريض الكانسر و هما عارفين أنه في آخر ايامه و مات من غير ما أشوفه..بنهار نفسيا لما بفتكره ..
-بصي كل حاجة بسبب متظلميش نفسك بجلد الذات إنك إزاي سكتي، يمكن لو كنتي مشيتي في الأول كنت هتفضلي تسألي نفسك هل أنا تسرعت ؟ بس بعد ما استحملتي وعديتي قدرتي تفهمي
أدي وقت الزعل حقه عشان لما ترجعي أحسن تبقي أقوي
شهقت كاميليا بندم:
-عمالة أقول كنت ساكتة ليه ؟
إزاي أسامح نفسي إني عملت في كدا ؟ ..و إزاي مزعلش إنها اتحسبت عليا جوازة و هما كلهم شهرين أو ثلاثة اللي قعدتهم مع زوجي والباقي كنت عايشة لوحدي مع أهله .. اللي حصل مكنش سهل أبدا
-علشان كده بقولك خدي وقتك في الزعل لكن متستمريش عليه .. متسمحيش له يظلمك مرتين .. هو ظلمك قبل كده.. لكن إياك تسمحي لنفسك أنه يظلمك مرة تانية وتفضلي واقفة مكانك بسببه
انسي انسي و تجاوزي و اشتغلي على نفسك و شخصيتك و تفكيرك واشغلي نفسك أوي و متبصيش وراك الماضي راح بإيجابياته و سلبياته اتعلمي بس و كله بالوقت بيعدي
همست كاميليا بملل:
-المشكلة إني بفكر في طليقي طول الوقت سواء بالسلب او الإيجاب و مش عارفة أطلعه من دماغي إزاي
-التجربة حصلت وعديت بيها للأسف وأثرت على فترة في حياتك مينفعش تخليها تأثر على الباقي كمان وهو لازم تلغيه من عقلك ومتعاقبيش نفسك على حاجة ملكيش ذنب فيها
المهم دلوقتي يا كاميليا .. هطلب منك شوية حاجات تبدأي تعمليها إن شاء الله بعد ما تقومي بالسلامة .. هنبدأ نروح چيم و نتعلم تمرين يوجا ونقرأ كتب معينة هكتبلك أسماءهم اشتريهم هتفيدك جدا وتعرفك أكتر عن شخصيتك.. واليوجا ياريت تلتزمي بيها بجد بتخرج كل الطاقة السلبية .. وكمان نهتم كويس أوي بدراستنا علشان تكوني أنجح وأشطر .. أنا عايزة ال ٣ سنين الجايين دول كاميليا تكون خلصت دراسة واتخرجت واشتغلت و معاها بنوتة جميلة.. عيشي علشانك.. علشان كاميليا وبنتها اللي جاية في الطريق
في يوم من الأيام ستدرك أن أصعب شيء مررت به كان خيرًا عظيمًا وفر عليك وجعلك أقوى مما كنت عليه من قبل ، وهو الشيء الذي سيبهرك وسيجعلك تنسى هذا الألم ، فلا تيأس.
_______