أخذتها أمها في حضنها وجلست معها على سريرها وهي تحاول تهدئتها:
– ادعي يا كاميليا .. ادعي ربنا يا بنتي وقولي دايما اللهم أجرني في مصيبتي و اخلفني خيرا منها يارب… و إن شاء الله ربنا يعوضك كل الخير و عن كل إللي مريتي به
أومأت فاتن بإيجاب:
-فوضي أمرك لله واتفرجي على حقك وهو بيرجعلك ولو بعد حين واتأكدي طول ما أنتِ مظلومة ربنا هيعوضك أكيد بأمر الله ده وعد ربنا لنا
صرخت كاميليا بقهر:
– ليه هو إللي سابني بعد كل ده هو اللي سابني !! .. أنا حبيته واستحملت كل ده علشانه يا ماما .. وكنا ممكن نكمل لو عيشنا في شقة بعيد عن أهله .. ليه كل ده .. ليه أصلًا
مكملناش
وليه خليتوني ارجعله…رجعتي للبيت ده تاني كسرتني…عيشت يوم صعب صعب بكل ما فيه… ياريتني ما رجعت ياريتني
قال جدها :
– حقك عليا يا كاميليا انا اللي وافقت ترجعي واقنعتك ترجعي معاه..بس يا بنتي اوعي تتمني انك كنتِ ممكن تصلحي حاجة
الغلط الأكبر إنك كنتِ تكملي في علاقة فيها راجل ملوش شخصية وبيمشي برأي أمه …
ردت كاميليا بصوت مختنق :
– حتى بنتي الدكتور عايزني أنزلها .. قال لي احتمال تطلع مشوهة.. وبيقول لازم تنزل
لما روحتله امبارح قالي كده
قال جدها بحزم:
– خلاص ما كده أفضل .. يمكن ربنا عمل كده.. بدل ما كان فيه أطفال تربطك بِه.. يمكن
ده الأنسب لكِ وده إللي ربنا شايفه أفضل
أومأت أمها :
– نزلي البيبي طبعا .. ربنا بعتلك فرصة تعيشي بطولك من غير عيل يربطك بهِ .. بلاش تضيعي الفرصة دي
همست كاميليا رافضة بنبرة شاحبة ضعيفة:
– لأ .. مش هقدر … أنا خايفة
صاحت أمها بغضب :
– بطلي بقى سلبية و تفكير غلط .. مش كفاية اختارتي غلط وكمان عايزة يبقى معاك عيل منه.. وأنتِ إللي هتشيلي المسؤولية في الآخر