اعتذرت كاميليا بخجل:
– معلش لخبطنالكم الدنيا انا و دانا
قاطعتها منى قائلة:
– متقوليش كده دي بنوتة عسولة و هادية.. دي لو عايزة تقعد معانا على طول تنور.. ربنا يخليهالك ويحفظهالك
– ميرسي يا طنط
اقتربت سارة وهي تسلم على كاميليا بابتسامة:
– ازيك يا كاميليا
– ازيك يا مدام سارة
سارة بنبرة شقية:
– لا سارة بس.. دا احنا حتى قريب هنبقى أهل ولا انتي عندك رأي تاني
احمرت وجنتي كاميليا خجلا .. لتردف سارة بتفكير :
– بصي بقى احنا نسيب نديم يروح الشغل وانتي تقضي معانا اليوم انتي ودانا و كمان تاخدي اجازة النهاردة
رفضت كاميليا بأدب:
– تسلميلي والله بس صعب عشان امبارح خدت اجازة.. ولسه هرجع دانا البيت
سارة بتصميم :
– لا طبعا المدير بتاعك يسيبك ترتاحي النهاردة .. احنا لازم نقضي اليوم دا سوا وحتى عشان بنتك تهدى شوية من اللي حصل امبارح
أجابها نديم قائلا :
– خلاص يا كاميليا خليكي