– حرام عليكي يا ماما … ومصاريف دانا و مصاريفي… انتي عارفة اني مقدرش مشتغلش
عاتبتها صفاء قائلة :
– دوري تاني وتالت بس حاجة تكون جنبنا… حاجة بعيد عن الشغل ده … انا مش عارفة عقلك كان فين وانتي بتضربي الراجل ده بالجزمة يا كاميليا… لتكوني فاكراه سامج الكلب
ضحكت كاميليا:
– والله هو سامج فعلا انتي مبتكدبيش
ثم اردفت بحزن:
-بس لا يا ماما أنا شوفت البنت كأنها انا … خوفت يحصلها زي اللي حصلي
قاطعتها امها بلهجة حاسمة:
– واهو جه على دماغك… شوفتي .. عشان تبطلي تدخلي نفسك في حاجة متخصكيش… من بكرة تكلمي صاحبتك نسمة وتبلغيها انك هتسيبي الشغل وهي تبلغ المديرين بتوعك لو انتي مكسوفة تكلميهم … انا معنديش اغلى منك… وشوية كده الدنيا تهدى تدوري على شغل قريب من البيت … ان شاء الله حتى لو ترجعي تشتغلي كول سنتر تاني …
همهمت باعتراض:
– يا ماما مش هينفع.. انا تعبت عشان الاقي الشغل ده
لتتنهد امها بحزن وخوف ممزوج بحنية :
-وانا تعبت عشانك… ومعنديش استعداد اخسرك… عشان حتة شغل هيتعوض ولا عشان راجل زي طليقك الواطي اللي لو كنتي كملتي معاه كان ممكن يموتك… خلاص يا كاميليا… ولو اتكلمتي تاني هقولك مفيش شغل خالص و خلي دانا تروح حضانة عادية يا بنتي ومعاش ابوكي وانا وجدك ونساعد معاكي وخلاص….
– بس يا ماما…
بصوت غاضب صرخت أمها:
– مش عايزة مناقشة… بكرة الصبح تتصلي بصاحبتك وتبلغيها الخبر
تركتها كاميليا لتذهب إلى غرفتها بحزن.. فوالدتها صممت تماماً
لتهمس امها لنفسها بحزن بعد دخول ابنتها غرفتها:
– متزعليش مني يا كاميليا انا خايفة عليكي.. الدنيا بقت وحشة اوي
بعد مرور يومين
اتصلت كاميليا على نسمة صديقتها لتخبرها بأنها ستترك عملها بدون اي أسباب … و وصتها بأخبار وحيد ونديم بقرارها
يتبع …..