– اسمعي يا بنتي… لو كنتي فاكرة لما حد كان بيعجب بيكي زمان وانتي لسه آنسة.. ف دلوقتي الدور اتعكس
– مش فاهمة قصدك
هتفت والدتها بتحذير:
– فرص الارتباط بالمطلقة اكتر من الآنسة..لكن مين بقى اللي هيكمل !
نفت كاميليا بقوة :
– ومين قالك اني ممكن ارتبط اصلا بحد !؟ هو بعد اللي شوفته من الزفت سامح ده ممكن افكر في راجل تاني ولو حتى كجواز..
لا يا ماما… انا خلاص رميت طوبة الرجالة دي من زمان..
– قوليلي تمن الهدوم دي كام و انا اكملك عليهم وياخدهم … بس ده بعد ما تقدمي استقالتك
زفرت كاميليا مدافعة عن نديم :
– انتي بتقولي ايه يا ماما .. كل ده عشان حكيتلك اللي مديري عملوا معايا … الراجل كتر خيره ولا قال ارتباط ولا كلام من ده
صاحت امها بخوف وهي تأخذ ابنتها في حضنها :
– حتى لو نيته كويسة … انا مش بتكلم عليه … انا بتكلم عن اللي حصلك…انتي كنتي هتودي نفسك في داهية … كان ممكن يدبحوكي و يرموكي والله اعلم هيعملوا ايه تاني … ده ربنا سترها معاكي
تمتمت كاميليا لوالدتها:
– بس الحمدلله ربنا سترها وعدت على خير .. ايه لازمتها اقدم استقالتي واسيب الشغل.. انتي عارفة اني لقيته بصعوبة.. وبعدين الناس خدوه واتضرب واكيد اتأدب ومش هيتعرضلي تاني
قاطعتها صفاء بحدة مبالغة:
– وانا هستنى أما يحصلك حاجة ؟؟؟
لا يا كاميليا.. شيل ده من ده يا بنتي … في داهية الشغل .. الشغل يتعوض .. كل حاجة تتعوض الا انتي
كاميليا باعتراض: