—
بالليل راح اخدهم من المستشفى وطلع على الشقه الي عجبت عفاف جدا
شهاب بص ناحيه ملاك لاقها واقفه بتبص على الشقه ومش بتتكلم: عجبتك
بصتله وكان باين على ملامحها انها مش مرتاحه: حاسه انها واسعه اوى وبتخوف جدا
عفاف وشهاب ضحكو عليها جامد لانها بتفكر شبه الأطفال: دى واسعه….. اومال لو كنا رجعنا الفيلا كنتى عملتى ايه
ملاك: الفيلا… هو انتو عندكم فيلا
عفاف: ايوه ياحبيبتي
ملاك: طب ليه جايين هنا طالما عندكم فيلا
شهاب مش عاوز عفاف تتكلم معاها في شي يخص المعز: احمم… هاتى ملاك يماما تتفرج على اوضتها يمكن تعجبها
ملاك مشيت مع عفاف وهيا متحمسه تشوف اوضتها، اول ماشهاب فتح الباب ودخلت تشوفها عجبتها اوى لانها كانت هاديه جدا: الحيطان باللون الوردى والسرير مش كبير اوى وفيه مكتبه كده في ركن من الاوضه فيها كتب كتير
شهاب فرح لما شاف على وشها الفرحه: هااا..عجبتك الاوضه
بصتله وهيا بتضحك وغمازتها ظاهرين: حبيتها اوى شكلها كيوت خالص