مسد على شعرها واتكلم بحنان وهو بيبعدها عنه
_انتِ تخصيني ياحبيبة ومينفعش اشوفك في مشكله ومساعدكيش
ابتسمت برقه وبصتله بنظره مختلفه ولأول مره تحس بمشاعر ناحية كرم مقدرتش تفسرها
فسر كرم النظرات دي على انها امتنان وشكر علشان كده ابتسم بحزن واتكلم بهدوء
_انا عارف ياحبيبة انك اكيد اتصدمتي واتضايقتي لما عرفتي انك لسه على ذمتي لأنك مش بتحبيني وبعد اللي عملته معاكي لما كنت مش في وعيي كرهتيني اكتر
علشان كده انا هحررك مني ومش هفرض نفسي عليكي بس في نفس الوقت هفضل في ضهرك وقت ما تحتاجيني
اتضايقت جداً من كلامه عن الفراق لكن مقدرتش تنطق بكلمه وتمنعه
لأن حتى لو كرم بيحبها مستحيل ينسى انها خدعته قبل كده و همته انها بتحبه علشان تنتقم من ابن عمها
وفي نفس الوقت خمن كرم سكوتها ده على موافقه على الطلاق
غمض عنيه بحزن وبعدها فتحهم وبصلها واتكلم بصعوبه
_حبيبة انتِ…
كرم كان ناوي يرمي يمين الطلاق على حبيبة لكن اللي منعه صرخة منار بإسم اختها وهي بتجري عليها تحضنها
حبيبة بادلتها الحضن ودموعها نزلت بفرحه ان كرم مطلقهاش واختها انقذت الموقف وكرم ساب الاوضة وطلع بمشاعر كتير متلغبطه
منار بلهفة وخوف
_انتِ كويسه يا حبيبة ، حاسه بحاجه وجعاكي
_اهدي والله انا كويسه واغم عليا لأني كنت مرهقه جداً اليومين اللي فاتوا بسبب اللي بيحصلي