_علشان هو محبهاش ، وكانت كل يوم تيجي تشتكي منه وتقول انه بيعاملها وحش
ياريتني ما جوزتهاله منك لله ياخديجة انتِ وابنك منكم لله
حبيبه كانت ساكته ومش حاسه بأي حاجه بتحصل حواليها وكل اللي كان في دماغها مشهد سهيله وهي واقعه على الارض وكرم واقف قدامها
بعد ما مشيت منيرة بعيد عنهم خديجه بصيتلها
_متعرفيش حاجه عن اللي حصل ياحبيبة
مسحت دموعها واتكلمت بإرهاق
_كرم جاله الصبح رساله ان سهيلة بتخونه وبعدها جاله صور ليها مع واحد غريب
اتعصب جداً وراح بيتها وانا لبست وروحت وراه ولقيت سهيلة حصل فيها كده
فكرت خديجه في الكلام واتكلمت بغضب
_كل ده مدبر لأبني وفخ معموله علشان يلبس القضية دي
هزيت حبيبة دماغها بتأكيد
_بالظبط كده
واللي عمل كده اكيد ابو البيبي اللي في بطن سهيلة
_انا رايحه اقول للمحامي على كل حاجه واكيد هو هيعرف يحل الكارثة دي والمعلومات اللي قولتيها دلوقت هتفيده
حبيبة طلبت من الظابط انها تشوف كرم وواقف بعد مناهدة
اول ما دخلت كان قاعد على الكرسي وماسك دماغه وعيونه حمرا
قربت منه ورفعت وشه ليها واتكلمت بدموع وحزن
_كرم
ساكت ليه.. سكوتك ده غلط..دافع عن نفسك واقولهم انك بريئ وملحقتش تعمل كده اصلا
_مش قادر اقول حاجه ياحبيبة