لكن انتِ مش كده ياحبيبة ، انتِ احسن من كده بكتير ويمكن تربية باباكي الله يرحمه ليكي كانت سلبيه اثرت شويه على شخصيتك لكن اللي متأكد منه انك مش عاجبك حالك ده وانك هتحاربي علشان تغيري شخصيتك المصطنعه دي وتبقي على طبيعتك اللي هتخلي كل اللي حواليكي يعشقوكي مش بس يحبوكي
بصتله بتأثر من كلامه وعيون بتلمع بأمل وفرحه وابتسامه سعيدة
اول مره حد يشكر فيها وفي شخصيتها وكان مش اي حد
ده كرم
كرم اللي دخل حياتها وبيحاول يغيرها للأحسن
بصوا لبعض بشرود وعيونهم قالت كلام كتير
وحس كرم بمشاعر مختلفه جداً ناحيتها
كان لسه هيقرب منها لكن رنة تليفونه منعته
رجع تاني مكانه بإحراج واتوتر وحبيبه رجعت لوعيها وبصيت للشباك وكرم رد على تليفونه بضيق
_ايه ياسهيلة في ايه
اول ما سمعت اسمها زفرت بضيق وغيرة لكن منعت ان ده يظهر على ملامحها وهي بتفكر نفسها ان جوازه منها مؤقت وجوازه بسهيلة هو اللي هيدوم
بعد ما خلص مكالمته اتحرك بالعربية ناحية بيت والدته ووصل بعد فترة
طلعوا الشقة مع بعض وخديجة فتحت الباب بفرحه واخديت حبيبة في حضنها بحب كبير
_نورتي بيتك يا غالية
ابتسمت حبيبة بحب
_بنورك ياطنط
_لأ طنط ايه قوليلي ياماما ،ادخلي ياحبيبتي اوضة كرم حطي فيها هدومك وحاجتك والبسي حاجات مريحه عقبال ما احضرلكم الاكل
يلا متتكسفيش
اخدت حبيبة شنطتها ودخلت الاوضه اللي خديجه شاورت عليها
بص كرم لخديجه واتكلم بجدية وهو بيقعد على الكنبة