كنت متفاجئة من الكلام اللي اتقال قدامي ده… بصيت لمحمد مستنية منه توضيح لكن شاورلي اقوم معاه وقومت… اتمشينا شوية ووصلنا عند اوضة… إلهان فتح الباب وبص لمحمد بإبتسامه وقال
– ايه رأيكم ؟
أنا اتفاجئت من حجم الأوضة وجمالها… اداله المفتاح وكمل
– عايزكم تاخدوا راحتكم على الآخر… البيت بيتكم… عن اذنكم…
مشي ودخلنا الأوضة… محمد قفل الباب علينا وقعد على الكنبة بيقلع الكوتشي بتاعه…
‘ مين ده يا محمد واحنا هنا بنعمل ايه ؟
* إلهان صديق قديم اتعرفت عليه أول ما سافرت…
‘ ايوة برضو مفهمتش… احنا بنعمل ايه هنا ؟
* هنقعد عنده…
‘ ليه ؟ وفين بيتنا راح ؟
* عمك اخده…
‘ اخده ازاي ؟
* اخده زي ما بياخد أي حاجة… بالتزوير والرشاوي أثبت إن ابوكي الله يرحمه متأجر منه بيتنا اللي كنا عايشين فيه… ودلوقتي قِدر ياخده بعد ما أثبت للمحكمة إن البيت بتاعه…
قعدت جمبه وبحاول استوعب اللي سمعته ده
‘ طب وانت عرفت ازاي ؟
* محامي ابوكي قالي…
‘ امتى حصل الكلام ده ؟