فرحت جدا إن الولاد وافقو بعدها بكام يوم حددنا معاد مع عليتها وكل حاجه تمت بسلاسة وكتبنا كتابنا أنا ومروى و بقينا نختار العفش مع بعض وتعرفت عليها أكتر الوقت دا وهي كمان قربت من الولاد أكتر و خصوصا كرم لأنه الوحيد الي كان رسمي معاها لما كانت بتيجي قبل كده وعملنا فرح بسيط بين أهلنا
مروى كانت بالنسبالي عوض ربنا ليا الزوجة الصالحة الي يتمناها أي راجل بتعامل أمي زي أمها حتى ولادي وحده غيرها كانت قالت ماهي أمهم عايشة تاخد بالها منهم هيا انا مالي بس هي كانت زي الأم التانية ليهم
وشهور وسنين عدت وإحنا كنا عيلة مبسوطة وخصوصا بعد ما ربنا رزقنا وعرفنا إن مروى حامل لحد ما في يوم الباب خبط ولقيت أخر شخص كنت أتوقعه
مجدي بدهشة: سمااح
بصتلي بدموع: ممكن أدخل
دخلتها و أمي ومروى إستقبلوها أحسن إستقبال يليق بأخلقنا إحنا و كرم وكريم كانو قاعدين حوليها يهدو فيها
سماح ببكاء: بعد ما اتجوزت بإسبوع جوزي باع الشقة الي إتجوزنا فيه وروحنا نعيش في بيت عيلته على أساس يعمل بفلوسها مشروع كبير ويشتريلي بدل الشقة فيلا خلال كم شهر ومن وقتها و أنا في مشاكل بسبب حماتي و بنتها و إفتراهم عليا طول الوقت
كانت حماتي طول الوقت تقلب جوزي عليا وتقولو عني كلام محصلش
لما كنت بدافع عن نفسي قدمه تقعد تعيط وتقولي إني أنا مفترية وجوزي الأولاني كان عنده حق لما طلقني
وأخرتها كانت لما ضربني و طلقني و إنفجرت في العياط و كرم كان وخدها في حضنو وبيطبطب عليها
مجدي: و إنتي مخليتيش أبوكي يقف معاكي ليه المرة دي