مبقاش عاجبه…أمه بدأت تشتكي منها وغزل حتي مبتبررش بتقوله هتصلح الوضع وبتكبر دماغها…بدأ يفكر في كلام أمه عن الجواز التاني..لو ده هيخلي غزل تعقل يبقي مفيش مشكلة….
خلصت صلاة وغيرت هدومي وانا بستعد انزل لحماتي عشان أشوف هي عايزة ايه للاسف النهاردة راحت عليا نومة مرة تانية…أنا لسه في أول حملي والدكتورة
قالت طبيعي احس بتعب في أول تلات شهور ونصحتني ارتاح بس للاسف لو ارتاحت يوم مبخلصش من كلام حماتي…بتقوم صلاح عليا وانا مبرضاش اتكلم وبحترم أنها ست كبيرة وبسكت وبحاول اعمل الحاجة من
سكات…ساعات بتعب ومبقدرش اكمل وبعد منهادات هي اللي بتكمل الشغل طبعا بعد ما تديني كلمتين تس*م بدني بيهم…اتنهدت وانا بفتكر ازاي حياتي كانت حلوة مع صلاح لما كنا بعيد…كنا مبسوطين بس بسبب ظروف صلاح المادية اللي فجأة اتدهورت
اضطرينا نيجي نعيش هنا مع أهله في الشقة اللي فوقيهم…من اول ما جيت هنا وانا مش حاسة أن ليا خصوصية ابدا…حتي علاقتي بجوزي باظت بسبب كلام حماتي ورغم اني حامل وتعبانة الا اني بحاول اراضي الكل…
نزلت تحت وانا مبتسمة وقولت:
-صباح الخير يا حماتي.
بصتلي وقالت:
-قولي مساء الخير يا اختي الضهر اذن…
اتوترت وقولت:
-اسفة يا حماتي انتي عارفة الحمل وال….
ضحكت بتريقة وقالت:
-ما كلنا حملنا وولدنا يا اختي انتي بس اللي فرفورة وبتدلعي…أنا فطرت وفطرت عيالي…انتي روحي شيلي السجاد واكنسي واعملي الغدا ورتبي اوضة منار عشان تعرف تذاكر كويس