قاسم سألها فجأه : ليه وافقتي عليه يا أوليان؟ انا ياما حذرتك من رسلان ، وقولتلك انه مش مناسب ليكي.!
أوليان انتبهت على كلامه وردت بشرود : مش عارفه ، مش عارفه.. كنت معجبه بشخصيته على ايه؟ فاكر لما قولتلك انه طلب مني اننا نرتبط؟ ساعتها انت قولتلي اوعي تغلطي الغلطه دي يا أوليان وانا قولتلك انت مش بتحبه ليه.. فاكر؟
قاسم اتنهد ورد : قولتلك ساعتها انه مش الشخص اللي انتي بنيتي على حياتك، ولا هو بالشخصيه اللي انتي شايفاه بيها ،. قولتيلي انك كبرتي على اني افرض عليكي رأيي ولازم تتخذي قراراتك لوحدك!
أوليان هزت راسها بأسف وغمضت عنيها ونزلت دموعها بو’جع : انا كنت مغفله بدرجه كبيره وكان صعب عليا افهم انه بيخدعني عشان يقدر يكسرني لما رفضت انه يرتبط بيا بشكل غير رسمي.. كان لازم اسمع كلامك في اهم قرار في حياتي ، انا أسفه سامحني يا قاسم.
فتحت عينيها الحمراء من البكاء واتلقته بيبص عليها من المرايه ، غض بصره بسرعه واستغفر ربنا.
قاسم بخفوت : مفيش وقت للندم يا أوليان احنا لازم نتصرف في الموضوع ده بأسرع وقت!
أوليان هزت راسها بنعم وقالت : معاك حق .. طيب هنعمل ايه؟ صح هو فين رسلان؟ مش معقول موصلش لغاية دلوقتي!
قاسم ببرود : اهو مرمي في السجن لغاية ما الشرطه تاخد اقوالك ولو عايزه تعملي محضر..!
أوليان انتفضت بصدمه : س..سجن ايه يا قاسم؟ مين اللي بلغ عليه؟