وفعلا خشو اهل ندى نساوين خوتها وعماتها وخلاتها وحتى نساوين عمها كانو حاضرين
خشو بعدهم اهل ريحانه مع خلاتها يلي مش عاجبهم العجب ويلي كانو ميتين ضحك من اول ما خشو ….
انزفو العرايس الاثنين وقعمزو على الكوشه وكانت تعابير وجه العرايس تختلف
كانت ندى مقعمزه تتفرج وبسسس الابتسامه والمسايره يلي كانت على وجها في حفلتها خلااااص معش قادره ترسمها على وجها من جديد خصوصا انها ماسكه دموعها بسيف متبيش تبكي من جديد بعد ما عدلولها مكياجها للمره الالف
اما ريحانه فكانت احسن مثال لي كلمة (قايمه حاجبها ومحد عاجبها )ومره مره تطلق في ضحكة بدون سبب
المعازيم مكانش عددهم كبير يعني كل الموجودين كانو من عيلة العرسان بس
قعمزو العرايس دقايق وقدمو لي اهلهم الضيافه وركبت كل عروسه لي شقتها
____________________________________
نجمه:كانت مروحه وسط الحي وماسكه هلبااااا اكياس في يديها
تتمشى وهيا سااارحه وسط كل ها العمارات والشقق الراقيه يلي في الشارع وتسأل نفسها
معقوله بتكمل حياتها بروحها وهيا كل اهلها عايشين !
معقول رح تكمل عمرها كله وحيده في ها الشقه !
مستحيل لان الشي هادا ميخشش العقل ولا يمشي في بلاد زي بلادنا اصلا مستحيل
فكرت ان اكيد الشي هادا رح يكون مؤقت بس
واكيد بعدين رح يهدا غل ابوها وعمامها من امهم وترجع ويستقبلوها
لان مهما كان وفي الاخير هادي تقعد بنتهم ومستحيل يديرو فيها شي غلط ❤️
قاطع كلامها وتفكيرها صوت شبابي جي من خلفها وهوا يقول