الساعه 6 العشيه الشمس خفيفه بس قاعده مودعتش السماء 🌤
النسمات البارده عاطيه جمال لي الجو ❤️
ريحة الارض بعد مطرة الليل كانت عالم تااني🫧
اختارت نجمه تتمشى مسافه طوووويله قبل ما تاخد تاكسي وتمشي لي بوها
الوقت يلي تتمشى فيه عشان تاخد فرصه تحكي فيها مع روحها وتجهز كلام ومببرات لي بوها وعمامها
تفهمهم وين كانت وامها شن حكتلها وشن يلي صار
والاهم انها تجهز الاسئله يلي بتسألها ليهم
ويلي كان محتوى وبداية كل سؤال ……(علاش)؟
كانت حاسه بي الغباء كيف الفتره يلي فاتت كلها مفكرتش ترجع لي بوها
مهما كان هوا في النهايه بوها ومستحيل يضرها في شي
لكن التفكير هادا يقاطع فيه ذكريات امها وهيا تبكي وتتوسلها انها مترجعش لي بوها ولا حتى تتواصل معاه
في العاده كانت امها تحبها اكتر بس هادا ميعنيش ان بوها ميحملهاش اي مشاعر يعني في النهايه هيا بنته
وزي ما ربونا وعلمونا اهالينا (مفيش اب ميحبش بنته)
بس احيانا الاهل ميكونش عندهم الوعي الكافي لي هلبا حجات
كل ها الكلام والاسئله قاطعتهم سياره كحله عاليه كانت جايه تجري درست في نص الشارع
ونزل المرش
يزن:بدون اي ملامح تعبيريه ….اركبي
نجمه:ضحكت بي استهزاء …..نعم؟!
يزن:معنديش خلوق نعاود كلام
نجمه:ماعندي وين نركب بعد عليا وخليني في حالي