حكى لها عبد الله ما حدث بالتفصيل
يمنى: يا نهار أبيض… كل دا حصلها…. دا شافت كتير أوي، بس إيه الي خلاك واثق فيها لدرجة تجيبها البيت
عبد الله: صعبت عليا، تخيلتك مكانها
يمنى: افرض طلعت حراميه ولا كدابه ولا نصابه
عبد الله: أنا معايا بطاقتها، احنا هنخليها قاعده معانا يومين كدا لحد ما نشوف حل، وأنتِ خلي عينك عليها
يمنى بابتسامه: ومالو وأهي تسليني بدل قعدتي لوحدي، ومتقلقش أنا هعرف هي صادقه ولا كذابه، بنتك أصلًا مسمينها المحقق كونان
وقفت تتمايل وتغني: كونان… كونان يكتشف الغامض والمثير …
ضحك عبد الله على حركات ابنته فهي تشبه المرحومه والدتها في خفة الدم والقبول.
أردف عبد الله بابتسامه وهو يُعد الطعام: كونان…. كونان هيا يا كونان
وبعد تناول العشاء
-هو… هو حضرتك ممكن تساعدني ألاقي أي شغل؟
عبد الله: حاضر يا سلمى هساعدك… بس انتِ كمان لازم تشوفي جامعتك وتكملي
سلمى: مجموعي يدخلني كلية علاج طبيعي
عبد الله: ما شاء الله …وأنا هحاول أساعدك وأقف معاكي لحد ما ربنا ييسرلك حياتك
يمنى بابتسامه: علفكره أنا في تالته هندسه…… لو احتاجتِ أي حاجه…
سلمى بدموع: أنا مش عارفه أقولكم إيه والله…
عبد الله: متقوليش حاجه إنتِ زي بنتي… ويلا قومي عشان تنامي
إنها رحمة القلب ونقاء الروح التي تجعلك تساعد شخص لا تعرفه لمجرد أن الله قد وضعك في طريقة لتفرج كربه، فمن أحبه الله سخره ليقضي حوائج الناس،