الضجه خفت شويه ووقفت فى منتصف الغرفه كنت لامحه المنطقه قدام الشرفه وكان فيه ناس خارجه من القصر ولاحظت انهم بيجرو رجليهم بطريقه غريبه وكان من بينهم الراجل إلى قاله الشخص إلى استقبلنى يا عمى!
مقدرتش افتح الشرفه ولا اقرب منها، الضجه خفت وانا روحت فى النوم
معرفش كانت الساعه كام لما فتحت عنيه، بس القصر كان هس
مفيش ولا صوت فيه
وكنت جعانه جدا، خرجت من غرفتى يمكن اقابل حد من الخدم وكانت الشمس فى كبد السماء
ما قابلنيش ولا انسان، نزلت فضلت ماشيه لحد ما عترت فى المطبخ
فتحت تلاجه كبيره لقيت فيها جبن وحاجات غريبه اكلت لحد ما شبعت وعملت شاى
مفيش حد ظهر زى ما يكون القصر اتهجر فجأه، طلعت قعدت فى الحديقه يمكن اشوف حد مكنش فيه اى بشر كمان
قعدت اسأل نفسى هو فيه ايه وحصل ايه؟ العشب والأشجار كان مظهرهم جميل جدا. وفضلت ماشيه بين الخضره إلى خدتنى خلف القصر
فيه بحيره كبيره واسعه وجميله بيلعب بيها اوز وبط وطيور مختلفه