فتحت باب القصر وباكو معايا اتمشينا على العشب قدام القصر ولفينا حول السياج كنت بشوف لو فيه حاجه مقطوعه او تالفه
لكن السياج كان تمام
شمال القصر بصيت على الغابه، مختلفه جدا عن الليل ورعبه، بالنهار تحس الغابه هاديه جدا وجميله لكن بالليل مرعبه
وقلت لباكو ايه رأيك ندخل الغابه نشوف ايه الى كان بيصرخ بالليل وعامل القلق دا كله؟
باكو مشي لورا، تقهقر للخلف، اه يا جبان يا باكو، لكن متخفش
احنا مش هندخل الغابه بأيد فاضيه
هناخد معانا سلاح
اخترت بندقيه كلاشنيكوف علقتها فى عنقى ومسدس ثبته أسفل حزامى واعتمرت قبعه لبنيه
وفتحت بوابة السياج وباكو هيموت وينط من حضنى
باكو مش رجوله منك انك تسيبنى ادخل الغابه وحدى؟
اثبت شويه من فضلك؟
وشعر باكو بالخجل ونط على الأرض ومشي جنبى غصب عنه
مشينا فى نفس الطريق إلى يتوسط الغابه، طريق مدكوك بالاقدام
مسافه نص كيلو مكنش فيه حاجه