– ليه عشان تضمها لعيلة السماح؟ العيلة اللي مش لايق عليها اسمها خالص !
رمقها بحدة ثم تركهم وخرج
صاحت فاتن بغيظ :
– البني آدم ده كل ما بيتكلم بتأكد أن الطلاق كان أنسب حل لكاميليا
__________
بعد مرور ثلاث سنوات وشهرين
ذهبت كاميليا إلى الجامعة … لترى نتيجتها ظهرت أم لا .. فأوقفها طالب معها بالكلية .. قائلًا لها :
– شوفتي النتيجة؟
هزت رأسها بنفي لتسأله بتردد:
– لا هي نزلت ؟
ابتسم الشاب قائلًا :
– آه مبروك .. أنت الأولى على الدفعة في المادة بتاعت دكتور سليم والدكتور في القسم بيقول للكل إنه مبسوط من ورقتك جدا
شكرته كاميليا وقابلت صديقتها أمل لتبارك لها بسعادة:
– مبروك يا كوكي…
كاميليا بسعادة غير مصدقة ما قاله لها زميلها الطالب منذ قليل :
– أمولة.. أنا لحد دلوقتي مش مستوعبة إن عوض ربنا لي حلو أوي كده .. الحمدلله يارب
ابتسمت أمل بفخر:
– ولسه أنا واثقة إن ربنا هيكرمك .. أنت تعبتي كتير أوي في حياتك وإن شاء الله ربنا هيعوضك.. ده كفاية إنك كنت شايلة مسؤولية بنتك طول السنين اللي فاتت وكنت بتشتغلي مع الدراسة وده كان صعب عليك