هزت أمها كتفيها بشدة تهدئها:
– في إيه يا كاميليا مالك بس
دفعت أمها عنها وهي تقترب من اختها قائلة :
– الطلاق كان بيحصل نفسيا قبلها بكتير .. بكتير أوي
ثم أردفت وهي تشملهم بنظرات نادمة:
-في كل مرة احتاجت فيها جوزي يطبطب عليا وسابني بعد أول شهر واسبوع جواز وسافر … و في كل مرة حكيتله علي إللي واجعني وكان بيستهزأ به ويقلل منه .. ولا لما كنت بتمنى يبقى رومانسي معايا ولو لحظات ويحسسني إني ست … ولا ..
في كل مرة كنت بوريه فيها شكلي في فستان جديد و يتريق ويتنمر على شكلي و حسسني فيها إني نص ست وإني مش كفاية له رغم أنه كل الناس كانت
بتشهد اني حلوة ..
شحب وجهها بشدة وهي تهز رأسها وأخذت دموعها تجف على خديها :
-الطلاق حصل من زمان أوي … بس النهاردة كان مجرد إثبات على ورق … الطلاق حصل لما كنت بعيط لما بطلت أشوف فيلم رومانسي واتضايق لأني نفسي
أعيش لحظات زي دي مع جوزي ..
– ياااه ده الطلاق ده حصل من زمان أوي… 6 شهور جواز عشت فيهم مع جوزي بس شهرين…
ظلمني واخد حقوقي…مؤخر ودهبي اللي بعته عشانه…
اتنازلت عن المحضر عشان بيساومني اخد القايمة بتاعتي…وأنه ممكن يحرمني من كل جهازي
عانقتها امها وهي تبكي :
– ربنا هيعوضك يا حبيبتي والله ربنا هيعوضك عن كل حاجة مريتي بيها
ردت فاتن بتصميم:
– لا بقولك ايه….احنا مش هنزعل على الزفت سامج ده ولا يستاهل اصلا دمعة واحدة…اسمعي احنا هنخرج النهاردة…وهنروح ماكدونالدز إللي في كايرو فستيفال سيتي ..
وتطلبي اغلى حاجة هناك ونلف شوية بقى.. وبعدها نتمشى شوية بالعربية بتاعة جدو وكمال هو اللي هيسوقها
همست بضعف :
– لأ مش هقدر .. روحوا انتوا