رددت سميحة بذهول :
-عارف ؟
لتضيف بهستيرية:
-عارف وطلقتني؟؟؟ وحارمني من ولادي ؟؟
وسايبني اتمرمط كل ده؟
زفر زوجها بضيق :
-أيوة علاء قالي واعترف لما الدنيا بينا باظت وانفصلنا وقالي أنه مكنش هيعملك حاجة هو كان عايز يخوفك زي ما
اتبليتي على دنيا بكلام محصلش وهو مكنش فيه بينه وبينها حاجة وأنها مجرد عيلة صغيرة بالنسبة له وجارته وصعب عليه انك اتكلمتي عنها وحش قدام اخوها وحرمتيها من أنها تحقق حلمها وتعمل معادلة عشان تدخل جامعة او معهد … بس انا خلاص مبقتش مأمنلك لانك كدبتي عليا وكلمتيه من ورايا رغم انك المفروض مش
غلطانة !!
وبعد الفضائح دي كلها مبقاش ينفع نرجع
– ليه يا عبدالله… ليه كده… وعيالنا؟
قاطعها بحزم:
– قبل ما تتكلمي عن العيال.. انا عيالي هيتربوا معايا يا سميحة.. وانتي عايزة تشوفيهم براحتك مش همنعك منهم وهخليهم يباتو عندك وقت ما تحبي…لكن عيالي هيتربوا معايا مش عشان مش مأمنلك بس عشان عايزهم يطلعوا متربين بطريقة صح…
شهقت بلوعة:
– طب وانا يا عبدالله مش هتسامحني؟.
صاح بحدة :
– انتي كذبتي عليا يا سمحية مع أنك لو كنتي قولتيلي مكنتش هعملك حاجة .. لكن تروحي تكلمي راجل من ورايا عشان ينقذك؟؟
اللي خايف من حاجة ميتهزش
بس عشان أنتِ نيتك وحشة وساعدتي أن البنت الصغيرة دي تكلمه و بوظتي علاقتها بأهلها … ربنا وقعك انتي..
عموما انتهينا وياريت منتكلمش تاني في الحوار ده و اي حاجة تبقى مع أمي وهي اللي هتخليكي تشوفي عيالك وتبعتهملك .. سلام..
ليغلق الهاتف معها وهي ترتمي على السرير تبكي بشدة وندم..