استقبلتها جهاد قائلة بترحيب:
– أهلا يا كاميليا ازيك .. دانا عاملة ايه؟
كاميليا بتردد:
– الحمدلله بخير .. كنت عايزة اطلب منك طلب
– اتفضلي.. طب ادخلي هتفضلي واقفة على الباب كده
– معلش علشان ورايا حاجات هخلصها ولسه هعدي على دانا أجيبها من الحضانة
جهاد بتصميم وهي تدخلها إلى الشقة :
– لا طبعا اتفضلي برضو
كاميليا بخجل :
– كنت عايزاك تنبهي على عمر ابنك ميكلمش باباه فيديو كول قدام دانا بنتي .. أنا عارفة إن دانا بتحب تلعب مع عمر و زينة ولادك بس أنا بنتي بتفضل تسأل بابا مش بيكلمني زي بابا عمر ليه وأنت عارفة ظروف والوضع بتاعها
قالت جهاد بحدة:
– الظروف دي أنت اللي عاملاها يا كاميليا .. مش ولادي اللي هم سبب فيهم
ثم أردفت بتحذير:
– أنا أقدر أمنع ولادي يكلموا باباهم المسافر قدام بنتك .. بس أنت بقى تقدري تمنعي زمايلها لما تروح الحضانة.. هتقدري تمنعي الناس اللي في الشارع !
نظرت اليها وكأنها نادمة على طلبها ثم قالت بضيق :
– أعتقد مالوش لازمة الكلام ده .. أنا طلبت منك حاجة معينة وخلاص
– لا لازم تسمعي الكلام ده .. اللي أنت عاملاه لبنتك ده غلط
ردت كاميليا مدافعة عن نفسها:
– والصح إني أقولها أنا وبابا منفصلين وتتعقد وتحس إنها مظلومة ومش سوية نفسيا وأقل من غيرها
قطبت جهاد حاجبيها بدهشة :
– والصح بقى إنك تعشمي بنتك أن لها أب موجود!!
كاميليا بغيظ :
– عشان أبوها موجود .. بس مختفي ومش بيسأل عنها و ده ميخصنيش .. انا يخصني نفسية بنتي متحسش إنها أقل من حد
قاطعتها جهاد بغضب
– غلط يا كاميليا.. أكبر غلط .. كذبك على بنتك في حاجة زي كده في حد ذاتها كارثة.. خلقتي جواها أمل إن بابا راجع في يوم وهيكلمك بس مسافر بس مشغول .. بنتك كل ما تقعد مع ولادي مش عندها سيرة غير بابا اللي مسافر وهيرجع قريب.. صارحي بنتك يا كاميليا..