=اشمعنا
_لا ولا حاجه، دا احساس بس جوايا
=طب استعد عشان فاضل على نص الليل دقايق وتظهر الرسمة الأولى اللي هترسمها
خرج وسحب الباب وراه، كانت اول حاجه عملتها اني روحت دخلت الأوضة، ماكانش فيها غير سريرين، واحد فيهم كانت فيه ثناء، متكممه ومربوطة من رجلها بجنزير حديد في زاوية السرير ومنورلها النور الاحمر اللي متسرب من الشموع لجوة أوضتها….
طفلة بنت تلتاشر سنة عايشة وسط عيله كلها مسكونة بالجن لغاية ما جا يوم ولقت نفسها مربوطة ف اوضة ضلمة مش كعقاب على حاجه عملتها وبدون أي
مقدمات
روحت حليت الربطة اللي حوالين بوقها وقعدتها وقعدت جنبها ع السرير
كانت بتبكي ومنهارة لكن بردو حسيت فيها حاجه غريبة، انا كنت متخيل انها هتكون منهارة بالكامل او في حالة تشنج او في حالة عصبية لكن لقيتها اللي هو زي عيل صغير امه معاقباه بانها ضربته او حبسته في اوضته لكن بردو حاولت أهديها وقلت
=ماتخافيش انا معاكي، ماتخافيش احنا ف نفس بيت جدو، كل الحكاية انهم بس جابوكي هنا عشان تونسيني في حبستي
لقيتها كفكفت دموعها وبصت لي ب وش جامد ماكانش وش عيّلة طبيعية ابدا
_انت فاكرني عبيطة، انت جاي تخد العهد، وانا جاية اتقدم للسانور
انا اتصدمت، يمكن رجعت بجسمي لورا من الخضة
بعدها ابتسمت ابتسامة باهته
=انتي بقا حاكينلك كل حاجه
_ايوة عارفه كل حاجه، انا عايشة ف البيت دا طول عمري
بصت حواليها شمال ويمين بعدها رجعت بصت لي
_وشوفت فيه اللي أغرب من الخيال، شوفت فيه حاجات تشيّب، يعني انا مش عمري ١٣ انا عمري ممكن يكون ٢٦ من اللي شوفته
=شوفتي ايه ؟
_شوفت عيله كلها مسكونه ف العيال لازم يكونوا ممسوسين ومسيرهم يتسكنوا، شوفت الجن بالف شكل، حيوانات خيالات انوار ونيران وضلام وضلال،حسيت حرارة حضورهم وقبضتها وفرجة غيابهم، حسيتهم بيتحرشوا بيا وبيترجعوا عشان العهد بعدم المساس قبل المحيض ، حسيت اللي قد عمري ٥ مرات