الزور
كانت أول مرة أرد عليه لما قلت
=وانا ينفع أكون وريث؟؟
كان وضح في نبرة صوتي اني خلاص بدأت أخضع لاندهاشي ، ماهو اللي مش طبيعي اني أكون ماشي وسط ثروة أكبر من ثروة بنك صغير وماندهش ولا أتغر
يمكن وقتها عرفت ليه عدايلي فوق مهووسين وساكتين
ابتسم وقال
_يمكن ييجي من صلبك الوريث وتكون عليه وصي، أما انت او غيرك لاجل يدخل من باب علم الكلمة فمحتاج عهد جديد ، يمكن العهود انقطعت من قرون واللي بيحصل مجرد امتداد لعهود قديمة بنحاول نحافظ عليها، كل فين وفين لو قدر حد يدخل بعهد جديد وماظنش واحد زيك يقدر عليها….
حسيت بلحظة تراجع كإني بتمهل أو بحاول ألجم اندفاعي، او حتى زعلان من استقلاله بيا
لكن مجرد التفاته جديدة حواليا كانت كفيلة اني أسكت
خاصة انه كمل وقال
_لكن طالما بقيت مننا، فأكيد بقا لك من در عملنا وعلمنا،
شاورت براسي بمعنى الموافقة فكملنا طريقنا لغاية ما خلص الاستاندين
ف اخر الأوضة لقيت جزء مربع محطوط في وسطه بالظبط كرسي جلد مربع أسود كبير ومرسوم قدامه ع الأرض دايرة
ووراه حيطة الأوضة الأخيرة مرسوم عليها نفس الختم اللي كان على كتف صفاء
والحيطة اليمين كان متعلق فيها شمعدان من سبع شمعات سود مولعين، والحيطة الشمال كان فيها صفحات ورق أبيض متثبت ع الحيطة
استغربت ان مافيش غير كرسي واحد واستغربت من شكل الورق وان قصادة الناحية التانية شمعدان أسود
استغربت من شكل الختم الكبير ع الحيطة اللي ورا الكرسي
اللي كنا خلاص واقفين قدامه وهو سابقني بخطوة وانا واقف وراه
ولقيته ساعتها بيقول