المنشاوى : كنت عايز اتكلم معاكي شويه
(هدير بصت في ساعتها مره تانيه )
هدير: طيب لو ينفع بكره تعبانه اوي النهارده
المنشاوى : ( بص في الارض ) طيب اللي تشوفيه يابنتي
هدير : ( اتنهدت وقعدت جنب باباها ) بابا انا عارفه اللي جواك وعارفه قد ايه انت حزين علي امي الله يرحمها .. انت اكتر واحد عارف امي بالنسبالي كانت ايه
المنشاوى : من وقت اللي حصل وانا مش قادر انام .. مش عارف ازاي ماقدرتش احميها بالرغم من كل اللي حواليا
انتي عارفه انى وانا في الداخليه ماقدرتش احميها ولا احمي نفسي اومال لما اطلع علي المعاش كمان شهر هعمل ايه ؟
هدير : بابا انا اول مره اشوفك كده ضعي ( ولسه هتكمل راحت سكتت )
المنشاوى : كملي ياهدير قصدك ضعيف صح
هدير : بابا انا ماقصدش
المنشاوى : انا كنت مستقوي علي الدنيا بأمك ياهدير ولما ماتت حسيت اني ضهرى اتكسر ومش عارف اعمل اي
هدير : عايزاك تثق في داغر يابابا .. خليك واثق فيه وانا متأكده انه مش هيسيب حسام المره دي ( بصت في الساعه مره تانيه بتوتر )
وارجوك حاول تنام دلوقتي انت مانمتش بقالك كتييير
المنشاوى : حاضر يابنتي
هدير باست باباها من جبينه واخدت الطفله معاها ودخلت اوضتها ومابقيتش مصدقه ان ده المنشاوي .. اللواء المنشاوى اللي كان مستقوي عالدنيا كلها موت مامتها كسره وعرفت انه كان مستقوي عالدنيا بمامتها نصه التاني
وشريكته في الحياه
هدير اتنهدت وبصت للطفله لاقيتها لسه صاحيه
هدير : لازم تنامي بقي ياغدير الوقت اتأخر اوي