عمار : خليكي هنا ماتتحركيش من مكانك
عمار بسرعه جدا جرى وراح علي الموتوسيكل ركب وراح لشمس
الراجل صاحب الموتوسيكل طلع من المحل
عمار بسرعه وقف قدام شمس
عمار : اركبي
شمس كانت واقفه ويادوبك شايفه طشاش قدامها
ومش عارفه تركب ازاي
عمار : ( بيبص وراه لقي الراجل خلاص هيمسكه )
عمار : ( بغضب وزعيق ) قولتلك اركبببببي
شمس اتنفضت من مكانها وطلعت علي الموتوسيكل وهي خايفه جدا وقلدت عمار وركبت زي ما هو راكب بالظبط
حصان
عمار داس بنزين بسرعه ومشي بأسرع ما عنده
لاء ده مامشيش ده حرفيا طار
عمار والهوا في وشه وبيطير شعره لورا ( بص وراه لشمس )
عمار : حاولي تمسكي فيا جامد اوعي تسبيني مهما حصل
شمس قربت من عمار ولفت ايديها حوالين وسطه
سرعته كانت رهيبه لدرجه ان الكاوتشات من كتر السرعه كانت بطلع شرار حرفيا
عمار بص في الساعه اللي في ايده وبقي بيحاول يحسب الوقت اللي اتصل بيزن فيه ويحسب القطر هيوصل المحطه اللي بعد دي في قد ايه
وكان قدامه بالظبط اقل من ٢٠ دقيقه والقطر يوصل المحطه
عمار داس بنزين اكتر وطلع علي الطريق اخيرا
شمس وقتها من كتر الخوف كانت حرفيا بتترعش
قربت منه اكتر وسندت براسها علي ضهره وغمضت عنيها بقوه ..مره واحده من الخوف دموعها بقت تنزل علي ضهره