********************
وصلت قمر البيت ودخلت تحضر الفطار مع والدتها وبعد ساعة بدأوا يرصوا الاكل عالسفرة سوا وهما بيتكلموا عن يوم قمر كان عامل ازاي في الشغل
قمر بعصبية: ده رخم اوي كل شويه تاكسات وحاجه زفت
فردت نبيلة وهي بتضحك عليها: قولتلك اتدربي مع والدك ف الشركة وانتي اللي منشفة دماغك
قمر: يا ماما مش عايزه وليا اسبابي
فرد طارق من وراها وهو بيناولها اخر طبق اكل: سيبيها براحتها يا نبيلة
وقعد كل واحد فيهم على كرسيه والمغرب بدأ ياذن فشاف طارق ابنه وهو خارج من اوضته بيتاوب وقعد السفرة فقاله: طيب قول مساء الخير
اياد وهو بيبتسم: مساء الخير يا حج رمضان كريم
وبص لقمر وقالها وهو بيمد ايده بكوبايه فاضيه: شويه عصير عشان نفطر بقا
قمر وهي بتضحك: العصاير جنبك كلهم انت اللي عليك الدور
اياد: ماشي وانتي اللي عليكي الشاي
قمر: ماشي
وبدأوا يفطروا ويتكلموا ويضحكوا سوا وبعد ما خلصوا قعدت قمر مع والدتها يتفرجوا عالتليفزيون وطارق نزل يصلي واياد نزل يخرج مع اصحابه، وبعد شوية
قالت نبيلة وهي بتتاوب: انا هقوم انام شويه عشان تعبانه اوي
قمر: ماشي ماما
نبيلة: وانتي هتعملي ايه؟