سيف: هترفع عليه قضية بالقانون الجديد
چنى: احسن احسن
سيف: وبعدين يا چنى مش وقت شماته
چنى باعتذار: غصب عني بس قمر صعبانه عليا اوي من اللي عمله فيها، واكيد ده ذنبها
سيف: هي عامله ايه؟
شرحتله چنى حالة قمر بما انها دكتوره نفسية، فسألها سيف: تفتكري ممكن تعمل في نفسها حاجه من كتر الضغط النفسي ده؟
چنى: معتقدش، قمر اعقل من كده
سيف: انا حاسس انها هتعمل في نفسها حاجه
چنى: متخوفنيش عليها بقا
سيف: المهم خلي بالك من نفسك
چنى: حاضر
سيف: يلا سلام
چنى: سلام
وقفلت معاه ونادت على قمر بس مردتش عليها فنادت تاني بس مردتش عليها برضه فقامت راحتلها واول ما دخلت المطبخ لقت قمر واقفه بتعيط ومن غير كلام راحتلها چنى وطبطت عليها واخدتها في حضنها، وعياطها بدأ يزيد لحد ما جسمها ساب فنادت چنى عليها لما حست بتقلها بس مردتش عليها، فنادت تاني بس مفيش رد فرفعت چنى راس قمر من حضنها لقيتها مغمى عليها، فاخدتها عالصالة بسرعة ونيمتها عالكنبه وقعدت جنبها تفوقها، وبعد شوية فاقت قمر
وسألتها: انا فين؟
چنى: في بيتي
قامت قمر قعدت وسألتها: ايه اللي حصل؟
چنى: فضلتي تعيطي لحد ما اغمى عليكي، ليه كده؟
حطت قمر ايديها على وشها وعيطت وقالت: غصب عني مبقتش قادرة اسمع اسمه او اي حاجه عنه غير لما افتكر اللي عمله فيا