چنى: يعني هو ممكن يكون هنا في اي لحظه؟
سيف: ايوه
چنى: طيب اول ما يكون في الطريق هنزل انا اروح عند ماما
وسكتت شوية وسألته: وقمر، افرض شافها
سيف: مش هيشوفها، طالما انا هنا يبقا هي مش هتيجي، صح؟
چنى: ايوه، بس قصدي وانتو قاعدين في البلكونه بتتكلموا ممكن يشوفها
سيف: ان شاء الله لا
وفضلت چنى صاحيه لحد الساعة ١٢ بليل ودخلت نامت اما سيف فكان كل شوية يتصل بفارس بس مش بيرد عليه، وكل شويه الحج سالم يتصل به يطمن على فارس فيقوله سيف: مجاش
فيقفل معاه وفضلوا على كده لحد الصبح…..
***********************
نرجع لفارس
اول ما فرس وقف بعربيته ونزل منها لقى حد بيضرب نار عليه بص قدامه لقاه ابوه الحج سالم، اتصدم فارس من اللي ابوه عمله وفضل واقف مكانه مش بيتكلم، فقرب منه الحج سالم وهو بيقول: عاوز ايه؟
مردش فارس وحط وشه ف الارض، فقرب منه الحج سالم وقاله: ارفع وشك، عاوز ايه؟
رفع فارس وشه ولسه هيتكلم لقى قلم نازل على وشه من ابوه وقاله: اطلع بره، مترجعش من غير قمر