شد مازن هدوم فارس وبدأ يعيط: قولها تسامحني ووصلها الورقه
سيف: اتشاهد يا مازن
نطق مازن الشهاده بصعوبه ورا سيف وسلم روحه للي خلقها بين ايدين فارس اللي فضل ساكت مش مستوعب اللي بيحصل ودموعه بس هي اللي بتتكلم، قفل سيف عينين مازن واخده فارس في حضنه وهو بيعيط وحاول سيف يشد مازن من فارس بس كان مكلبش فيه، وفجأه لاحظ سيف انا دراع فارس الشمال بينزف جامد وفجأه اغمى على فارس……
ويمر يوم ورا يوم وفارس في المستشفى في غيبوبه وابوه وسيف جنبه مسابهوش، لحد اليوم التالت كان والد فارس قاعد عالكرسي اللي قدام السرير اللي نايم عليه فارس وكان سيف بيتكلم مع مراته بره في الفون
چنى بقلق: وانت عامل ايه؟
سيف: انا بخير متقلقيش
چنى: وفضلت جنبه ليه، مش قطعت علاقتك به خلاص
سيف: ده صاحب عُمري، مقدرش اسيبه حتى لو قولت كده، قلبي ميجبنيش
چنى بحنيه: انت طيب اوي يا سيف، انا بحبك اوي
سيف بابتسامة: وانا بموت فيكي
چنى: قولي بقا بلغت ابوه؟
سيف: ايوه وقاعد جنبه من ساعة ما عرف
چنى: كويس
سيف: كويس ايه ده ناويله على نيه عشان يعقله
چنى بقلق: ناوي على ايه؟
سيف: بعدين بعدين
*********