وقفلت الباب وراها ورجعت قمر على اوضة الضيوف واتكلمت مع والدها على اقتراح چنى، فوافق وسألها: هتروحو امتى؟
قمر: لسه هنرتب سوا
طارق: ماشي
وبعد شويه قاموا كلهم يناموا الا قمر فضلت صاحيه بتفكر ف اللي حصلها في اخر سنتين من عمرها….
******************
نرجع لفارس
صحي فارس على صوت تليفونه بيرن برقم سيف فرد عليه بسرعة
سيف بزعيق: انت فين احنا مستنيينك؟
فارس وهو بيقوم بسرعه: انا جاي حالا
وقفل الفون وغير هدومه بسرعه وطلع يجري على مكان تجمع القوات وتمم عليهم وبدأوا يتحركوا
وبعد نص ساعة وصلوا المكان المحدد وبدأوا ينزلوا من العربيات بالراحه وكل واحد اخد مكانه، وبدأ سيف وفارس ومازن يتحركوا ورا بعض ووراهم عساكر بيغطوهم، وقف فارس وبدأ يشاور لكل واحد ياخد مكانه حوالين البيت وبص لمازن وقال بصوت واطي: اتحرك يمين
مازن: تمام
*************
اتحرك مازن ووراه عسكري وهما داخلين لمحوا واحد واقف في الشباك فضربه مازن بالنار ونط للشباك وناول جثة الحارس للعسكري اللي اخده على جنب، وفارس اتحرك شمال وخلص عاللي واقفين اما سيف فضل مراقب اللي بيحصل، وفجأه واحد من العساكر وهو بيتحرك خبط في شادوف فوقع واللي في البيت سمعوه وبدأوا يضربوا نار على سيف وباقي العساكر وبدأوا يتعاملوا، لحد ما سمعوا صوت مازن بيصرخ وبعدها مسمعوش صوته تاني
*************
نط فارس وراه وبدأ ضرب النار يعلى جوا البيت لحد ما سكت فجأه، ساعتها اقتحم سيف البيت لقى فارس قاعد على ركبه وساند بدراعه مازن اللي كان بينزف من كل حته، وجنبه المجرم المطلوب متصاب في ايديه ورجليه فاخده سيف ورماه في عربية من العربيات، ورجع لفارس ومازن، فقال مازن لفارس: انا خايف اوي
سيف: اهدا يا مازن هتبقا كويس