چنى: معاكي حق، اهدي بقا خلاص
قمر: انا تعبانه اوي انا عارفه اني غلطت بس ليه اشيل الذنب لوحدي، وليه هو يعيش حياته؟
چنى: عشان احنا في مجتمع بيشيل البنت الغلط لكن الولد مهما عمل غلط بيتقال عليه طيش
قمر: بس قدام ربنا الاتنين متساويين في الغلط، مش كده؟
چنى: طبعا، وكل واحد هياخد جزائه
قمر: انا خايفة اوي من عقاب ربنا ليا وبحاول اعمل اي حاجه عشان يغفرلي ويسامحني انا ندمانه بجد
چنى: متقلقيش ربنا غفور رحيم وهيكرمك ويعوضك
قمر: يارب
في الوقت ده سمعوا جرس الباب بيرن فراحت قمر تفتح وكان اياد اخوها فسألها بقلق: انتي مبترديش على تليفونك ليه
بصت قمر لتليفونها وقالت: يا خبر كل ده، معلش يا يويو كان سايلنت
اياد: طيب هاتي چنى وتعالوا عشان نتغدى
قمر: حاضر
وسابها ورجع البيت اما قمر فقالت لچنى تغير هدومها وتيجي معاها عشان تتغدى وفعلا راحت معاها وبعد الغدا استأذنت چنى ترجع بيتها، فقامت قمر توصلها للباب فسألتها چنى: ايه رأيك نغير جو؟
قمر: ازاي؟
چنى: تعالي نسافر كام يوم نروح الشاليه بتاع جوزي
قمر: مش عارفه، هشوف بابا طيب
چنى: اكيد هيوافق عشان الحاله اللي انتي فيها، واهو منها فسحه وتهدي اعصابك
قمر: ماشي
چنى: سلام
قمر: سلام