قاطع جولة صمتي سؤال مرات عمي المفاجئ بدأت افرك ايدي بـ توتر:
ـ انا… و.. وقفت تعليم بعد الثانوي.
ظهرت الصدمة علي وشها واتكلمت بـ شك وكأنها فهمت السبب ولكن ماحبتش تظلمه.:
ـ ليه ماجبتيش مجموع يعني ولا حاجة تانية منعتك من تكملة دراستك..!!
هزيت راسي بـ لا واتكلمت بهدوء:
ـ لا انا الحمد لله كنت من اوائل المدرسة وجبت مجموع هندسة زي ما بحلم بس…
سكتت وانا مش عارفة اقولها اي هقول جدي كـ العادة رفض ولا هقول اني تخليت عن حلمي،
وكأنها فهمت هي فـ اتكلمت بـ حب وهي بتطبطب علي إيدي:
ـ ماتزعليش و امور كتير هتتغير إن شاءلله وتقدري تكملي تعليمك.
ابتسمت بـ فرحة وقبل ما اتكلم قاطعتنا ماما بكلامها الهجومي:
ـ ومين قال اننا عاوزينها تكمل علامها وتروح المدينة تبقي علي حل شعرها هناك بعدين البت مالهاش غير بيت جوزها وبناتنا كلهم عارفين الكلام ده كويس.
ابتسمت مرات عمي بـ سخرية:
ـ الكلام ده انقرض مع إنقراض الديناصورات و دلوقتي مافيش فرق بين بنت وراجل ادام في المعقول، ثم مين قال ان التعليم مش من حق البنات بالعكس انتوا الـِ بتدفنوا بناتكم بالكلام العقيم ده.
ـ خلاص يا ثريا بلاش تتكلمي احسن تبدأ تدينا محاضرة من محاضرات زمان بتوع العلام والعادات وماعنعرفش نسكتها واصل.
اتكلت مرات عمي الصغير ام سليم بـ غيرة واضحة في عنيها فـ ابتسمت مرات عمي والـِ اسمها نرجس بـ لامبلاه وسكتت..
كل ده وانا براقب كلامهم، ودلوقتي بس عرفت سبب كره كل نسوان العيلة ليها هما كانوا يتمنوا يكونوا مكانها ولما ماقدروش قرروا يطلعوها انها الغلطانة وان هما صح ومبسوطين بحياتهم كد.
ـ Hi guys
بصينا كلنا بـ أستغراب ناحية الباب لما سمعت صوت بنت ولأن اغلب القاعدين مش متعلمين فـ معرفوش هي بتقول اي.
ـ هي قالت اي يابت يا كيان حوسة لتكون شتمتنا..
ابتسمت بـ سخرية وانا بميل علي ماما بـ غيظ:
ـ عرفتي دلوقتي اي فايدة العلام ياما وانه مش صرمحة بس..!