عمي الكبير محمد زمان خالف كلام جدي واتجوز واحدة اجنبية اتعرف عليها في الجامعة جدي قاطعه لـ اكتر من 8 سنين لحد ما رجع يطلب السماح وهو معاه اولاده زياد ومراد وبعد محايلة كتير جدي وافق وسامحه ولما رجع الصعيد مراته طلبت الطلاق لانها مقدرتش تعيش هنا خصوصاً بس مضايقة نسوان العيلة ليها وغيرتهم منها واتطلقت فعلاً واخدت معاها زياد الـِ وقتها كان في اولى ثانوي تقريباً وفضل مراد مع عمي هنا وقتها انا كنت صغيرة تقريباً في اولي إعدادي
وبسبب جدي اتخطبتله لـ اسبوع واحد لأن عمي كان لسه بيحب طليقته فـ جه في يوم وقال انه هيسافرلها ومراد هيسافر معاه ولما عاند مع جدي، جدي طرده وقال ان ابنه مات لانه بيتخلي عنه للمرة التانية عشان واحدة ست.
اي حد يسمع الكلام ده مستحيل يصدق لان الكلام ده انتهي من زمان ولكن مع جدي الـِ متمسك بالعادات القديمة تصدق عادي..!
فات علي الكلام ده اكتر من خمس سنين اختفت فيهم اخبار عمي خالص لحد ما ظهر فجأة وطالب العفو، وكان شرط جدي اني اتجوز واحد من عياله وبما ان مراد اتجوز فـ مافيش غير زياد قال يعني انا لعبة في إيديه و هوافق علي الكلام ده، اصله هيعمل اي مثلا هيزعق ولا يضرب عادي الـِ يعمله يعمله و..
ـ يا ست كيان يا ست كيان جدك وصل هو والضيوف وبيقولك تنزلي بسرعة.
فاكرين الكلام الـِ قولته فوق انسوه
خالص…!!!
بصيت لماما واتكلمت وانا علي وشك البكاء:
ـ ناوليني العباية ياما.
وبالفعل ما كذبتش خبر وكنت بغير هدومي ونزلت انا وماما بعد ما سليم نزل بـ شوية
اصواتهم كانت عالية اوي وصوت ضحك جدي كان قالب الدوار شاطر يضحك دلوقتي اما معانا يقلب وش الخشب..
ـ بطلي برطمة يابت هتفضحينا.
فوقت من شرودي علي نغزة ماما ليا في كتفي وصوتها الهامس.
بصيت لها بـ غيظ وانا بتحسس كتفي بـ ألم..
دخلنا انا وماما لـ مكان النسوان القينا التحية، قربت ماما من مرات عمي والـِ كانت جميلة اوي جميلة بـ شكل مبهر يخليك تقع في حبها، سلمت ماما عليها بـ فتور وقعدت جمب باقي النسوان فـ قربت انا من مرات عمي وقبل ما اتكلم كانت هي بتاخدني في حضنها و ابتسامة واسعة مزينة وشها … ماهي طيبة يا جدعان اهي اومال ماما بتقول عليها ولية حيزبونة ليه..!!
بادلتها الحُضن في هدوء وطلبت مني اقعد جمبها فـ هزيت راسي بـ الموافقة وقعدت.
ـ بتدرسي في اي يا كيان..؟