هزيت دماغها بتأكيد
_اه ياسيف هتجوز غيرك..كرم يستاهلني اكتر منك وانا وهو بنكن مشاعر لبعض واظن انها حاجه متخصكش زي ما كرم قالك
_واللي بينا..وكل الحب اللي بينا نسيتيه علشان سوء تفاهم!
انتِ للدرجادي انانية ومتهورة
اتدخل حسان بعصبية وهو واقف في صف بنته كالعادة
_مخلاص بقا يا سيف البنت مش عايزاك
ايه هو بالعافيه
بصلهم وابتسم بألم والدموع اتجمعت في عنيه
_لأ مش بالعافيه.. براحتك ياحبيبة هانم
بس انا بقا دلوقت اللي بنهي كل حاجه مبينا ومش عايزك في حياتي تاني
مشى من قدامهم بغضب وقهر ومأخدش باله من منار اختها اللي واقفه عالسلم ودموعها بتنزل علشانه واللي كانت بتحبه جداً لكن مخبيه مشاعرها عليهم كلهم
لأنه مرتبط بأختها
بعد ما سيف مشي حبيبة حسيت انها اتهزيت من جواها وندمت شوية
لكن لما افتكرت صوره وهو في حضن البنت عنيها لمعت بغل وبصيت لكرم بإبتسامه مصطنعه
_انا اسفه جدا ياكرم على اللي حصل
_ولا يهمك ياحبيبة
حسان بهدوء
_اتفضل يبني اقعد علشان نكمل كلامنا
قعد كرم وحسان وحبيبة واتكلم حسان بجدية
_انا معنديش مانع انك تتجوز بنتي طالما هي موافقه
بس عايز اعرف هتعيشها فين بعد الجواز
_انا معايا شقة كبيرة في منطقة كويسه وعربية وكمان مرتبي حلو
ولو الجوازة تمت اوعدك اني هعيش بنت حضرتك في عنيا وهخليها مش محتاجه حاجه
هز حسان دماغه بهدوء وهو بيبص لحبيبة اللي حس انها في وادي تاني ومش معاهم اصلا
بص لكرم بتفحص وحس ان راجل قاعد قدامه وقد المسئولية وكمان واضح ان شخصيته قوية
رجع بص لبنته وحس انها محتاجه حد زي كرم في حياتها لأنه الوحيد اللي هينفع مع شخصية دلوعة جداً ومتهورة زي حبيبة
_وانا موافق..بس ليه عيلتك مجاتش معاك
_انا قولت ان دي هتبقى قاعدة بيني ومبين حضرتك ولو الامور تمت هجيبهم كلهم ونقرا الفاتحه