قربت منهم واتكلمت بتوتر ورعب
_بابا..بابا فين يامنار
منار عياطها زاد واتكلمت بصعوبه
_بابا مات يا حبيبة..بابا راح وسابنا
“بابا مات ياحبيبة..بابا راح وسبنا”
بعد ما منار قالت الكلمه دي وقفت حبيبه تبصلها بصدمه وعقلها رفض يصدق اللي قالته واتكلمت بعصبية
_ايه التخلف اللي بتقوليه ده انتِ كمان
بابا فين
قرب عمها ببكاء وحزن وهو بيحاول يهديها
_ادعيله بالرحمه يابنتي هو دلوقت بقا في مكان احسن
_لا..لا انتوا بتكدبوا عليا صح قول انكم بتكدبوا عليا
صرخت ببكاء لما لقيت كلهم ساكتين وبيعيطوا
جريت على الاوضه اللي واقفين جنبها وفتحت الباب لقيت ابوها نايم على السرير ووشه متغطي
قربت ببطئ وهي بتترعش وشالت الغطا من عليه ودموعها نزلت بوجع واتكلمت بهمس وهي بتحضنه
_بابا علشان خاطري قوم..انت عارف اني مليش غيرك بعد ماما
عايز تسيبني انت كمان!
انا مش هقدر اعيش من بعدك والله ما هقدر على حاجه زي دي علشان خاطري قوم
انت طول عمرك بتدلعني ومغرقني بحبك وحنانك..ليه عايز دلوقت تبقى اناني وتاخد كل ده وتمشي
طب خدني معاك..انا مبقاش ليا لازمه في الحياه من بعدك خدني معاك علشان خاطري
دخل سيف وعمها وهما بيحاولوا يتحكموا في نفسهم ومينهاروش علشان يقدروا يسندوها
حاول سيف يبعدها بس هي فضلت تصرخ بقهر علشان يسيبها وبعدخا استسلمت للدوامه السودا اللي هاجماها وفقدت الوعي