وسحبها بعيد وقالي: انا هاوصل ماما للقطر وراجع اوغي تخرجو ولا تقفوا بالشباك زي ماعلمتك ياحلا
قولتله : حاضر يابابا
جريت وبصيت من ورا الشباك وشوفتهم بيركبو عربية بابا
وبعد. ساعتين رجع بابا لوحده ومعاه صاحب العمارة ومحامي وعقد وبابا مضى هو وصاحب العمارة واخد شنطة فلوس ودخل لم هدومنا وعفشنا ولبسنا
وبالليل كنا راكبين عربية بابا وانا حاضنة عروستي باربي وحبيبة معاها تويتي وورانا عربية فيها عفشنا
وبعد شوية وصلنا بيت جدو والد بابا طلع يستقبلنا هو والعيلة
جرينا عليه انا وحبيبة اخدنا بالحضن وفضل يبوس فينا ويدينا شيكولاتة كالعادة
وبعد مابابا واخواته نقلو عفشنا في شقة بابا الي ماما كانت رافضة تعيش فيها زمان
جدو طلع وقعد هو وعمي منصور وعمي محمد مع بابا وقاله: ايه الي حصل يامنير
بابا: طلقت منال
جدو: ليه
بابا: مش مرتاح ومشاكلنا كترت واتفقنا نتطلق بشرط. تسيب البنات وتسافر لأهلها بدل ماالبنات يتعقدو
عمي منصور: نورت بيتك يامنير
عمي محمد: ياما قولتلك منال متنفعش بس…
قاطعه جدي: خلاص ياولاد نصيبهم كدة ياللا انزلوخليهم يرتاحو
وقبل مايمشو طلعت طنط فادية مرات عمي محمد بصينية مليانة اكل وفاكهة وسلمت علينا وباستنا ونزلو كلهم
ماعدا جدي الي قعد يلعب معانا
وفجأة :…….
وفجأة بابا قال لجدي: شوف ياحاج انا دلوقتي محتاج اتطمن على البنات طول ماانا بالشغل
جدو: متقلقش مراتات اخواتك فادية ونوال موجودين وعندهم ولادهم من سن بناتك
بابا: لا ماينفعش انا ماضمنش يعاملو بناتي ازاي بغيابي
جدو: خلاص هايفضلو معايا انا وتحت عنيا طول ماانت بشغلك لحد ماتشوفلك عروسة بنت حلال
بابا: عمري ماهجيبلهم مرات اب انا هاعيش ليهم مش هابهدلهم ابدا وكلها فترة صغيرة وحلا تدخل المدرسة وحبيبة تدخل كي جي 1 وانا الي بنفسي هاذاكرلهم واغسلهم واطبخلهم بس لحد ماارجع من الشغل هايفضلو عندك بشقتك
جدو: الي يريحك ياحبيبي