_ انا خلصت .
استنيت لحظة وبعدين فكيت الربطة من على عيني و فتحت عيني كانت زي القمر وهي مبلولة كدة .. وشيلتها بين ايديا ورجعت بيها أوضتنا تاني .. و قعدتها عالسرير
_ كدة احسن شويه؟
لقيتها اتنهدت واتكلمت براحة
_ احسن كتير قوي… شكرا بجد.
_ طيب استنيني لحظة .
سبتها وروحت جبت مستلزمات الاسعافات الاوليه من الحمام عشان اغيرلها عالجرح اللي واضح انة اتغرق ماية .. قعدت جنبها عالسرير
_ هتعمل ايه ؟!
_ الجرح كلة مايه كدة مش هينيمك من الوجع
_ طب ممكن براحة عشان فعلا بيوجعني .
_ حاضر.. براحة خالص اهوو.
انا مش عارفه هو جايب الحنية اللي على وشة دي منين … مكنتش قادرة اوصف كسوفي وانا في الحمام وعارفه انة معايا .. رغم محاولاتي الفترة اللي فاتت بس حقيقي الموقف دة غير خااالص …. وحقيقي مكنش ممكن يحصل .. حسيت اني فعلا مش هقدر … واتفاجات باللي عملة لو مكنش مخبي عينة وكان شايفني كان شاف انا كنت ببصلة ازاي وابتسامه عريضة على وشي..
انا قابلت رجالة كتير في حياتي بس اول مرة اقابل احمد حاسة انة شخصيه لواحدة كدة لحد النهاردة محاولش يستغلني في اي موقف عدى بالعكس بحس انه بيخاف عليا بجد وحنيتة دي حاجه تانيه لواحدها … لو يعرف انا دلوقتي شايفااه ازاي وبجد حبيت نفسي اكتر اني قابلته … يا دي الكسفة اهو رفع عينة اهوو وشافني وانا متنحالة و منشكحة كدة ببتسامة واسعة وبصالة.. يقول ايه دلوقتي بستغل انه بيغيرلي عالجرح وبسبله .
_ احمد… شكرا بجد على كل حاجه.
رفع رأسه وبصلي شويه وبعدين قالي
_ انا اللي عايز اعتذرلك كل اللي جرالك النهاردة كان بسببي .. حتى الكلام اللي سمعتية كنت انا السبب فية .. انا اسف بجد يا سيرين.
ايه دة هو في حد ممكن يبقى مؤدب كدة … لقيتني عايزة احضنة والله من كمية أسفاته وادبة دة.
كمل وهو لسة بيطهرلي الجرح اللي في راسي
_ انا عارف ان الوقت بيمر و انتي قولتيلي ان الدكتورة قالتلك ان مفيش وقت عشان كدة اوعدك اول ما تخفي هعملك اللي انتي عايزاة عشان ميفوتش الاوان وابقى انا السبب .
هو لية بيتكلم وهو زعلان كدة .. ده أنا مبسوطه قوي أخيرا حلمي هيتحقق وهبقى أم ومش هكون لواحدي تاني بعد ما يسبني … ااااه اهي دي اوحش حاجه في الموضوع انه الحنية دي كلها والرجولة اللي عمري ما شفت زيها هتسيبني …