أراوح وأشوفها حاسس كأني في صحرا وجوها مش قادر اتحملة ومستني لما اوصل لبستاني الاخضر، .. ايوا بالظبط هي تشبة البستان ….بقى مجرد النظر ليها بالنسبالي كأنه جايزتي كل يوم بعد ارهاق وتعب خصوصا انها بقت عادة عندها انها تحب اننا نتكلم في اي حاجه قبل ما ننام سواء في اوضتنا او في الصالة قدام التليفزيون…
بحب وقتي معاها بقى هو الحاجة الوحيدة اللي بستناها في يومي وبجد شايل هم اليوم اللي هييجي وتسيبني فيه .. لأ خلاص انا مش عايز افكر في دة دلوقتي هو انا ناااقص … وصلت وبدءت اطلع السلم جري … وحشتني جداااا بجد … اخيرااا وصلت … ايه دة هي فاتحة باب الشقة كدة ليه ….
دخلت !!!!! ايه دة اللي انا شايفة دة بجد !!!!
_ امي …. ا!!!!!!!
ايه دة!!!!!….سيرين عالأرض وسايحة في دمها … وامي وسمااح ايه اللي جابهم دلوقتي وايه إللي حصل ؟!!!
_ احمد !!! الحقنا .. احنا كنا لسة هننزل نوديها المستشفى.
_ سيرين … سيرين !!! ايه اللي حصل يا سماح… مالها يا امي..
مش قادر اوصف شعوري اول ما شفتها كدة حسيت فاجأة الدنيا بتسحب مني اغلى حاجه في حياتي دلوقتي بعد ما ربنا ادهالي.
شيلتها بسرعة واخدتها في حضني بخوف ونزلت بيها على أقرب مستشفى وانا مش مصدق انها هي اللي بين ايدي وغرقانة في دمها …
بعد ساعة تقريباً جبتها البيت ونيمتها في سريرنا بعد ما عملولها اللازم في المستشفى.. وبعد ما الدكتور خيطلها الجرح اللي في راسها وجبس لها رجلها بعد تنيتها اثناء الوقعة
_ وازاي يا امي البني ادمة دي تقول عني حاجة زي كدة .. شافت عليا ايه عشان تظن فيا كدة من الأساس واللي خلاها تعمل اللي عملتة دة في المسكينة اللي جوا دي .
_ ياابني انا والله هزقتها .. وطول ماحنا في المستشفى وهي بتعيط من اللي انا عملتة فيها … دة غير كلامك ليها انت كمان والسم اللي قولتهولها .. دي حتى خدت بعضها وجريت على تحت تستناني مع عمك حسن السواق في العربية اللي جابتنا عشان مش قادرة تستحمل اللي خادته مني ومنك .
_ وهي ايه جابها معاكي أصلاً… و ازاي امها وابوها وافقوا انها تيجي .
_ هي ما صدقت نتيجة كليتها طلعت واول ما عرفت انها نجحت قالت تيجي تفرحك وتشكرك مش انت برضه اللي كنت بتذاكرلها .
وانا مالي انا نجحت ولا منجحتش وبعدين مذاكرة ايه يا امي اللي بتتكلم عنها دي … الكلام دة ايام ماكانت في المدرسة وامها كانت تيجي وتقولي فهمها واشرحلها وانا بحكم الجيرة وبحكم انها كانت طفله كنت بذاكرلها لكن دلوقتي هي اتعدت حدودها في كل شئ مش كفاية كل اما أجي عشان اطمن عليكوا القيها راشقه معاكوا في البيت وكانها عايشه معاكوا .
_ خلاص بقى يا ابني وانا هحرج عليها تحكم عقلها قبل اي حاجه تعملها بعد كدة .
_ هي دي فيها عقل اصلا …
_المهم ليه جيتي فاجأة كدة مش انا قولتلكوا هدبر اموري وانزلكوا انا .